கேன்சர் (பகுதி 4)

புற்றுநோய் பற்றிய கட்டுக்கதைகளில் மொபைல் போன், வைஃபை,  உணவு மற்றும் ரசாயனங்கள் போன்றவற்றில் மொபைல் போன்களைப் பற்றி  முதலில் பார்ப்போம்.

புற்றுநோயானது "மனிதனால் உருவாக்கப்பட்ட நோய்" என்று மீண்டும் மீண்டும் நம்பவைக்கப்படுகிறோம். நம் நவீன வாழ்க்கைமுறைதான் புற்றுநோயின்  காரணமாக நம்புவது முட்டாள்தனம். நவீன வாழ்க்கைமுறையில் மிகவும் அத்தியாவசியமான ஒரு சாதனம் மொபைல் போன்கள் அல்லது செல்போன்கள்.

செல்போன் பயன்பாட்டின் அபரிவிதமான வளர்ச்சியின் காரணமாக மனிதர்களுக்கு (செல்போனிலிருந்து) ஏற்படும் கதிர்வீச்சின் தாக்கம்/அபாயங்களைப்பற்றி உலகெங்கிலுமுள்ள சுகாதார நிறுவனங்கள் ஆராயத்தொடங்கின.

நாம் நோக்கியாவில் பாம்பு விளையாடிய நாட்களிலிருந்தே பொதுமக்கள் மொபைல் போன்களைப் புற்றுநோய்க்கான காரணியாக சந்தேகிக்க ஆரம்பித்தனர். கடந்த 15-20 ஆண்டுகளில், மிகச்சொற்பமாக இருந்த மொபைல் போன்கள் இன்று கிட்டத்தட்ட அனைவரிடமும் இருக்கும் சாதனமாகிவிட்டது. பொதுவாக, மொபைல் போன்கள் மூளை புற்றுநோயை (glioma) உண்டாக்குவதாக நம்பப்படுகிறது! இதை சரிபார்க்க அமெரிக்காவின் தேசிய புற்றுநோய் நிறுவனம் (National Cancer Institute, NCI) ஒரு ஆய்வை நடத்தியது. அதில், 1992 முதல் 2008 வரையிலான காலகட்டத்தில் ஒட்டுமொத்த மூளை புற்றுநோயின் தாக்கத்தை கணக்கிட்டது. அதில் ஆய்விற்குட்படுத்தப்பட்ட 16 ஆண்டுகளில் மொத்தமாக மூளை புற்றுநோயின் எண்ணிக்கையில் எந்தவித மாற்றமும் ஏற்படவில்லை (அதிகரிக்கவில்லை). குறிப்பாக, இந்த காலகட்டத்தில்தான் செல்போன் பயன்பாடு கிட்டத்தட்ட பூஜ்ஜியத்திலிருந்து 100 சதவிகிதம் வரை அதிகரித்த காலம். மொபைல் போன்கள் புற்றுநோயை உருவாக்கக்காரணமாக இருந்தால், மூளை புற்றுநோயின் எண்ணிக்கை கணிசமான உயர்ந்திருக்க்கவேண்டும், ஆனால் அப்படி ஏதும் நடக்கவில்லை. அதனால், செல்போனுக்கும் மூளை புற்றுநோயிக்கும் குறிப்பிடத்தகுந்த அளவில் சம்பந்தமிருப்பதாகத் தெரியவில்லை.

இதைப்பற்றி மேலும் அறிய புற்றுநோய் பற்றிய ஆய்வுக்கான சர்வதேச நிறுவனம் (International Agency for Research on Cancer, IARC) 13 நாடுகளில், 30 - 59 வயது மக்களிடம், 5 - 10 ஆண்டு பயன்பாட்டை வைத்து நடத்தப்பட்ட இன்டர்ஃபோன் ஆய்வில் (INTERPHONE study) தெரிவிப்பது என்னவென்றால் செல்போன் பயன்பாட்டிற்கும் மூளை புற்றுநோய்க்கும் (glioma or meningioma) எந்த தொடர்பும் இல்லை எனவும் (முக்கியமாக) அதிகமாக செல்போன் பயன்படுத்துபவர்களுக்கு மூளை புற்றுநோய் (glioma) வருவதற்கான ஆபத்து மிதமாக இருப்பதாகவும் தெரிவித்துள்ளது. இதில் கவனிக்க வேண்டிய விஷயம் என்னவெனில், இவர்களின்படி ஒரு சராசரி பயனர் ஒரு மாதத்திற்கு இரண்டரை மணிநேரம் மொபைல் போன் பயன்படுத்துபவர் (அதாவது வாரத்திற்கு சுமாராக அரைமணிநேரம்) மற்றும் அதிகமாக செல்போன் பயன்படுத்துபவர் பத்து ஆண்டுகளாக ஒருநாளைக்கு அரைமணிநேரம் முதல் ஐந்து மணிநேரம் வரை செல்போன் பயன்படுத்துபவர். அதனால் IARC செல்போன்களால் உருவாக்கும் நுண்ணலை கதிர்வீச்சை (microwave radiation) சாத்தியமான புற்றுநோயுக்கியாக (possible human carcinogen) அறிவித்துள்ளது. அதாவது, அதிகமாக செல்போன் பயன்பாட்டிற்கும் மூளை புற்றுநோயிற்க்கும் ஒரு அனுமான இணைப்பு இருக்கலாம் என்று மட்டுமே பொருள் கொள்ளவேண்டும், மாறாக செல்போன்கள் புற்றுநோயை உருவாக்குமென்று உறுதிப்படுத்த முடியாதென்கின்றனர்.

இதைப்பற்றி இன்னும் தெளிவாக தெரிந்துகொள்வதற்காக IARC 2011-ல் Cohort Study of Mobile Phone Use and Health (COSMOS) என்ற ஆய்வை தொடங்கியது, அதில் 18 வயதிற்கு மேற்பட்ட சுமார் 2,90,000 செல்போன் பயனர்களை 20 முதல் 30 ஆண்டுகள் வரை தொடர்ந்து கண்காணிக்கும். இதன் முடிவு வருவதற்கு இன்னும் சிலகாலமாகும். அதுவரை இதைப்பற்றிய கட்டுக்கதைகளே மேலோங்கிநிற்கும். 

பொதுவாக, செல்போனில் நீண்டநேரம் பேசவேண்டியிருந்தால் ஹெட்ஃபோன்கள் (headphones) பயன்படுத்துவது நல்லது. ஹெட்ஃபோன்கள் radiofrequency ஆற்றல் வெளிப்பாட்டை தலைக்கு நேரடியாக கடத்தாமல் குறைக்கின்றன (ஏன்னென்றால் செல்போனின் ஆண்டெனா தலையில் நேரடியாக படுவதில்லை).

அடிப்படையில், நமது செல்களிளுள்ள டி.என்.ஏ (D.N.A) சேதமடைவதினால்தான் புற்றுநோய் ஏற்படுகிறது. அயனியாக்கம் கதிர்வீச்சு (Ionizing radiation) அணுக்கள் அல்லது மூலக்கூறுகளிலிருந்து எலக்ட்ரான்களை விடுவிப்பதற்கு போதுமான ஆற்றலைக் கொண்டிருக்கும்.  X-கதிர்கள் (X-ray), காமா கதிர்கள் (Gamma rays) மற்றும் அதிகமான புறஊதா கதிர்கள் (higher ultraviolet rays) போன்றவை Ionizing radiation - இவை சக்திவாய்ந்த ஆற்றலுள்ளது. ஆனால், மொபைல் போன்கள் மிகச் சிறிய அளவே ஆற்றல் கொண்டவை. டி.என்.ஏ-வை உடைப்பதற்கு அல்லது மாற்றுவதற்கு மொபைல் போன்களின் கதிர்வீச்சை விட மிக அதிகமான ஆற்றல் தேவைப்படுகிறது.

- Dr. T.K.B. காந்தி, PhD

(தொடரும்)

---

கேன்சர் (பகுதி 3)

"ஒரு பொய் சொல்றோம்னா அதுல கொஞ்சம் உண்மையும் கலந்து இருக்கணும்"  
- காந்தி பாபு (சதுரங்க வேட்டை, 2014)

"(புற்றுநோய் - CANCER) கேன்சர் ஒரு நோய் என்னும் வார்த்தையே பொய்.
உங்களால் நம்ப முடியாது ஒரு அதிர்ச்சியான உண்மை என்னவென்றால் புற்றுநோயை என்பது நோய் அல்ல வியாபாரம். புற்றுநோய் என்பது இன்று பரவி வரும் கொடிய நோய் மட்டுமின்றி குழந்தைகள், சிறார்கள், மற்றும் பெரியவர்கள் என அனைவரிடமும் பாரபட்சம் பார்க்காமல் பற்றிக்கொள்ளும் கொடிய நோய் ஆகும். இந்த பதிவை நீங்கள் மற்றவர்களுடன் பகிர்வதன் மூலம் இந்த மோசமான வியாபாரத்தை உலகம் முழுவதும் செய்பவர்களையும் தடுத்து நிறுத்தலாம்.
"கேன்சர் இல்லா உலகம்" - (WORLD WITHOUT CANCER) எனும் புத்தகம் உ ங்களில் எத்தனை பேருக்கு தெரியும். இன்றும் உலகம் முழுவதும் பல மொழிகளில் மொழிபெயர்க்கப்படுவதற்கு தடுக்கப்படுவதும், தடுக்கப்படுவதற்கு உண்டான காரணமும்  உங்களில் எத்தனை பேருக்கு தெரியும். இது வரை தெரியாத ஒரு வியாபார தந்திர உண்மையை தயவுசெய்து தெரிந்து கொள்ளுங்கள்,கேன்சர் என்பது நோய் அல்ல அது வைட்டமின் B17ன் குறைபாடு.
இதற்காக கீமோதெரபி, அறுவை சிகிச்சை மற்றும் பக்க விளைவுகள் தரும் மருந்தை தயவுசெய்து எடுத்துக்கொள்ள வேண்டாம். கடந்த காலத்தில் ஸ்கர்வி (Scurvy) எனும் ஒரு கொடிய  நோய் கடல்வாழ் மக்களை கொத்து கொத்தாக கொன்று குவித்தது. இதன் மூலம் பல பெரிய கைகள் நல்ல லாபம் பார்த்தன. ஆனால் பிறகு ஸ்கர்வி என்பது நோய் அல்ல வைட்டமின் C ன் குறைபாடு  என்பது தெரியவந்தது.
கேன்சர் என்பதும் இதுபோன்றதே நோய் அல்ல வைட்டமின் B17 குறைபாடு என்பதை மீண்டும் நினைவூட்டுகிறேன். மனித குலத்திற்கு தீங்கு விளைவிக்கும் சிலர் இதை வியாபாரம் ஆக்கி பில்லியன் இல் புரளுகின்றனர். இனி இந்த கேன்சர் நோயிலிருந்து விடுபடும் வழிமுறைகளை பார்க்கலாம்.
நீங்கள் கேன்சர் ஆல் பாதிக்கப்பட்டவரா? முதலில் அது எந்த வகை என்பதை உறுதிபடுத்திக்கொள்ளவும். பயம் கொள்ள வேண்டாம்.
தினமும் 15 முதல் 20 ஆப்ரிகாட் பழத்தை உண்டு வந்தாலே போதுமானது. இதில் வைட்டமின் B17 நிறைந்துள்ளது. முளைகட்டிய கோதுமை  கேன்சர் ஐ எதிர்த்து போராடக்கூடிய வல்லமைபெற்றது. இதில் வளமான நீர்த்த ஆக்சிஜன் மற்றும் கேன்சர் ஐ எதிர்த்து போராடக்கூடிய LAETRILE  லேட்ரில்  உள்ளது.
ஒரு அமெரிக்க மருந்து நிறுவனம் இதை சட்டத்திற்கு புறம்பாக உற்பத்தி செய்து மெக்ஸிகோ விலிருந்து உலகம் முழுவதும் விநியோகிக்கபடுகிறது. அமெரிக்காவிற்கும் இது ரகசிய முறையில் கடத்தி கொண்டுசெல்லப்படுகிறது .
DR . ஹரோல்ட் W . மேன்னர் என்பவர் "டெத் ஆப் கேன்சர்" என்னும் புத்தகத்தில் LAETRILE கொண்டு கேன்சர் ஐ எதிர்க்கும் மருத்துவ முறையில்  90% வெற்றி கண்டார்.
கேன்சர் குறைபாடு நீக்க உண்ண வேண்டிய உணவுகள்  :
1. காய்கறிகள்- பீன்ஸ் , சோளம், ,  லீமா பீன்ஸ், பச்சை பட்டாணி, பூசணி 2. பருப்பு வகைகள்- லென்டில் ( மைசூர் பருப்பு என சொல்வார்கள்) முலை கட்டியது, பிட்டர் ஆல்மண்ட் மற்றும் இந்தியன் அல்மோன்ட் ( பாதம் பருப்பு), இதில் இயற்கையாகவே வைட்டமின் பி-17 நிறைந்துள்ளது 3. பழங்கள்-முசுக்கட்டை பழம் ( Mullberries )இல் கருப்பு முசுக்கட்டை , பிளூபெர்ரி , ராஸ்பெர்ரி, ஸ்ட்ராபெர்ரி 4. விதைகள்-  எள் ( வெள்ளை & கருப்பு) , ஆளி விதை 5. அரிசி வகைகள்- ஓட்ஸ், பார்லி அரிசி, பழுப்பு அரிசி ( Brown Rice ), உமி நீக்கப்பட்ட கோதுமை, பச்சரிசி 6. தானியங்கள்- கம்பு, குதிரைவாலி.
கேன்சர் உணவுகள் ஒரு பட்டியல்:
அப்ரிகாட், லிமா பீன்ஸ், ஃபாவா பீன்ஸ் (Fava Beans), கோதுமை புல் (Wheat Grass), பாதாம், ராஸ்பெரிஸ், ஸ்ட்ராபெர்ரி, ப்ளாக்க்பெரி , பிளூபெர்ரி, பக் வீட் (Buck Wheat), சோளம், பார்லி, குதிரைவாலி, முந்திரி, மெகடாமியா கொட்டைகள்  (Macadamia Nuts), முளைகட்டிய பீன்ஸ், இவை அனைத்தும் பி-17  நிறைந்த உணவுகள்.
இதை கவனிக்க வேண்டிய மிக அபாயகரமான விஷயம் என்னவென்றால் நாம் அன்றாட வாழ்வில் பயன்படுத்தும் handwash liquid , dishwash liquid  இல் அதிகளவு கேன்சர் ஐ ஏற்படுத்த கூடிய பொருட்கள் உள்ளது. நாம் இதை பயன்படுத்தும் பொழுது இது நம் கைகளிலோ , உணவு தட்டுகளிலோ படிந்துவிடுகிறது. இது 100 முறை கழுவினாலும் சுலபத்தில் நீங்குவதில்லை. மேலும் நாம் உணவை சூடாக பரிமாறும்பொழுது இது உணவின் வெப்பத்தால் அதனுடன் கலந்து உடம்பிற்குள் சென்று புற்றுநோயை உண்டாக்குகிறது.
இதை தவிர்ப்பதற்கு  லீகுய்ட் ஜெல் உடன் சரி அளவு வினிகர் கலந்து உபயோகிக்கலாம். அதுமட்டுமின்றி நான் உண்ணும் காய்கறிகளில் கூட புற்றுநோயை உண்டாக்க கூடிய ரசாயனம் கலந்திருப்பதை நான் பலரும் அறிவோம். என்னதான் நாம் 100 முறை கழுவினாலும் தோல் மற்றும் தோலின் உட்புறங்களில் ரசாயன கிருமிகள் பரவிவிடும். அதற்கு   சிறந்த வழி  நீங்கள் தினமும் சமையலுக்கு பயன்படுத்தும் காய்கறிகளை வருடம் 365 நாளும்  உப்பு நீரில் ஊரவைத்தே பயன்படுத்துங்கள். அப்படி ஊறவைத்த காய்களை புதியதாக வைக்க வினிகர் சேர்க்கலாம்.
பிடித்ததில் அறிந்தது"

------

மேலுள்ள Whatsapp செய்தி ஒரு குழுவில் வந்தது. இதை படித்தஒருவர்  இதிலிருக்கும் சில வார்த்தைகளை வைத்து இணையத்தில் தேடினால் இந்த செய்தியை உண்மையென நம்பும் சாத்தியங்களே அதிகம். அனால் இது மிகப்பெரிய பொய்.

லேட்ரில் (Laetrile) என்பது அமிக்டலின் (amygdalin) என்பதின் செயற்கை வடிவம். அமிக்டலின் என்பது கொட்டைகள், விதைகள், லிமா பீன்ஸ், சோளம் போன்ற தாவரங்களில் காணப்படும் ஒரு இயற்கைப் பொருள். லேட்ரில் என்பது ஒரு வைட்டமின் இல்லை ஆனால் இதைசிலர் வைட்டமின் B17 என்று எதைவைத்து அழைக்கிறார்களென்று தெரியவில்லை.

அமெரிக்காவில், 1970-களில், லேட்ரில் - புற்றுநோயிக்கு எதிரான மருந்தாக பரவலாக நம்பப்பட்டது. ஆனால், லேட்ரில் அல்லது அமிக்டலின் போன்றவைகள் புற்றுநோய் மட்டுமல்ல வேறு எந்த வியாதியையும்  குணப்படுத்தக்கூடிய மருந்தாய் மருத்துவ ஆராய்ச்சியில் நிரூபிக்கப்பட்டதாய் எந்த ஆதாரமும் இல்லை. இன்றுவரை, மனிதர்களில் லேட்ரிலை வைத்து எந்தவொரு கட்டுப்படுத்தப்பட்ட மருத்துவ சோதனையும் (controlled clinical trial) வெளியாகவில்லை.

அமெரிக்காவின் தேசிய புற்றுநோய் நிறுவனம் (National Cancer Institute, USA), புற்றுநோயாளிகளுக்கு லேட்ரில் சிகிச்சையளித்த மருத்துவர்களின் அறிக்கைகளை ஒரு நிபுணர் குழு வைத்து ஆராய்ந்தது. அதில் 67 நோயாளிகளில் 2 பேர் நல்லமுறையில் தேறிக்கொண்டிருந்ததாகவும், 4 பேருக்கு புற்றுநோய் கட்டிகளின் அளவு குறைந்தனவாகவும் ஊகிக்கப்பட்டது. ஆனால் சிகிச்சையின் முடிவில் லேட்ரில்/அமிக்டலின் எடுத்துக்கொண்டர்வர்களுக்கு மேற்கண்ட எந்த ஒரு மேம்பாடும் இருக்கவில்லை. அமெரிக்க உணவு மற்றும் மருந்து நிர்வாகம் (U. S. Food and Drug Administration [FDA]) லேட்ரிலை புற்றுநோயக்கோ அல்லது வேறு எந்த மருத்துவ சிகிச்சைக்கும் இன்றுவரை அனுமதிக்கவில்லை. FDA அமெரிக்காவின் உணவுக் கட்டுப்பாடு மற்றும் மேற்பார்வை மூலம் பொது சுகாதாரத்தை கராறாகப் பாதுகாக்கும் ஒரு பொது நிறுவனம். அமெரிக்காவில் FDA-வின் அனுமதியில்லாமல் எந்தவொரு மருந்தும் சந்தைக்கு வரமுடியாது. இந்தியாவிலும் மற்றநாடுகளிலும் இதுபோன்ற பொது நிறுவனங்கள் இருந்தாலும் அவை FDA-வின் ஒப்புதலை உன்னிப்பாக கவனிக்கின்றன, அங்கீகரிக்கின்றன. இன்றுவரை லேட்ரிலை ஒரு மருந்தாக எந்தவொரு நாடும் ஏற்கவில்லை.

மேலும் hand washing liquid/soap, dish washing liquid/soap போன்றவை பொது சுகாதாரத்திற்கு மிகவும் அவசியமானவை. இவற்றால் புற்றுநோய் உருவாகுமென்று இன்றுவரை யாரும் நிரூபித்ததில்லை.

புற்றுநோயென்பது வைட்டமின் குறைபாடல்ல. கடந்த 5000 வருடங்களாக மனிதனுக்கு மிகப்பெரிய சவாலாகவே இருக்கும் உயிர்க்கொள்ளி நோயென்பதே உண்மை. மருந்து தயாரிக்கும் நிறுவனங்களின் நோக்கம் மருந்து விற்பனை மூலம் பெரிய லாபம்பெறுவதே என்றாலும் மருந்துகளை அங்கீகரிக்கும், கட்டுப்படுத்தும் பல்நாட்டு அரசாங்க நிறுவனங்கள் லாப நோக்கமற்றவை. அதனால், பல தரப்பட்ட விலங்குகளில் பலமுறை சோதனை செய்யப்பட்டு FDA  போன்றவொரு அரசாங்க நிறுவனங்களால் அங்கீகரிக்கப்பட்ட மருந்துகள் மட்டுமே எந்த நோய்க்கும் தீர்வு. நம்பிக்கைசார்ந்த மருந்துகள் நிச்சயம் உதவாது.

இதுபோன்ற போலி செய்திகள் மருத்துவமட்டுமல்லாது பொதுவாகவே உலகின் மிகப்பெரிய பிரச்னை. அடுத்தமுறை இதுபோன்ற ஒரு தவறான செய்தியை Whatsapp-ல் பகிர்ந்துகொள்வதற்குமுன் அது உண்மையாவென அங்கீகரிக்கப்பட்ட இணையதளங்களில் (genuine sites) தெரிந்துகொள்வது நல்லது மேலும் அதை பகிர்ந்துகொள்ளாமலிருப்பது அதைவிட நல்லது.

- Dr. T.K.B. காந்தி, PhD
(தொடரும்)

கேன்சர் (பகுதி 2)

புற்றுநோய் ஆராய்ச்சிக்கான சர்வதேச நிறுவனம் (International Agency for Research on Cancer [IARC]), இது உலக சுகாதார நிறுவனத்தின் [World Health Organization - WHO] கட்டுப்பாட்டிலுள்ள ஒரு கிளை நிறுவனம். உலகின் 184 நாடுகளில், தேசிய அளவில் புற்றுநோய்களின் தாக்கம் மற்றும் இறப்பு குறித்து நடத்திய ஆய்வின்படி உலக அளவில்:

1. மனிதர்களின் இறப்பிற்கு புற்றுநோய்தான் இரண்டாவது முக்கியக் காரணம் (முதலாவது இதய நோய் மற்றும் பக்கவாதம் [Ischaemic heart disease and stroke]). 

2. 2015-ல், உலகளவில் 88 லட்சம் இறப்பிற்கு காரணம் புற்றுநோய்.

3. உலகளவில், ஆறுபேரில் ஒருவர் புற்றுநோயால் இறக்கிறார்.

4. ஒட்டுமொத்தமாக புற்றுநோயின் தாக்கம் ஆண்களிடம் 25% அதிகமாக உள்ளது.

5. புற்றுநோயால் ஏற்படும் இறப்புகளில் சுமார் 70% குறைந்த மற்றும் நடுத்தர வருவாய் உள்ள நாடுகளில் ஏற்படுகின்றன (இந்தியா உட்பட).

6. புகையிலைதான் புற்றுநோயின் மிகவும் முக்கியமான காரணம் (புற்றுநோய் இறப்புகளில் சுமார் 22% புகையிலையினால்தான் ஏற்படுகிறது). 

---

இந்தியாவில் தேசிய புற்றுநோய் தடுப்பு மற்றும் ஆராய்ச்சி நிறுவனத்தின் அறிக்கை (NICPR) மற்றும் பிற நம்பத்தகுந்த அறிக்கைகளின்படி,

1. இந்திய மக்கள் தொகையை பாதிக்கும் முதல் 5 புற்றுநோய்கள் (ஆண்கள் மற்றும் பெண்கள் ஒன்றிணைத்து): 

     1. மார்பகப் புற்றுநோய் (Breast Cancer)

     2. கர்ப்பப்பைவாய் புற்றுநோய் (Cervical Cancer)

     3. வாய் புற்றுநோய் (Oral Cancer)

     4. நுரையீரல் புற்றுநோய் (Lung Cancer)

     5. பெருங்குடல் புற்றுநோய் (Colorectal Cancer)

2012-ம் ஆண்டின் ஆண் மற்றும் பெண்களின் புற்றுநோய் புள்ளிவிவரம் (தனித்தனியே):

© TKB Gandhi

2. 2016-ல் மட்டும் 14 லட்சத்திற்கும் அதிகமானோர் புற்றுநோயால் பாதிக்கப்பட்டுள்ளனர், இது 2020-ல் 17.3 லட்சமாக உயரும் (25%).

3. குறைந்த விழிப்புணர்வு மற்றும் தாமதமான கண்டறிதல் காரணமாக, இந்திய பெண்களிடையே புற்றுநோய் நிகழ்வுகளும், இறப்புகளும் வேகமாக அதிகரித்து வருகின்றன. 

4. முக்கியமாக, இந்தியாவில் பெண்கள் ஆண்களைவிட அதிகம் புற்றுநோயால் பாதிக்கப்படுகின்றனர் ஆனால் இறப்பு விகிதம் ஆண்களில்தான் அதிகம்.

5. 5. பெண்களின் புற்றுநோய் வரிசையில் (எண்ணிக்கையடிப்படையில்) சீனா, அமெரிக்காவிற்கு அடுத்தபடியாக இந்தியாவில் அதிகமுள்ளது.

6. 2015-ல், கேரளா, தமிழ்நாடு மற்றும் தில்லியில் பெண்களுக்கு ஏற்படும் புற்றுநோய்களில் 40% மார்பகம் (Breast), கருப்பை வாய் (Cervix), மற்றும் கருப்பை (Ovary) புற்றுநோய்களாகும்.

 

7.ஒருநாளில், சராசரியாக 2000 பெண்களில் புற்றுநோய் கண்டறியப்பட்டால் அவற்றில் 1200 பெண்கள் (60%) புற்றுநோயின் கடைசி கட்டத்தில் உள்ளனர்.

8. தமிழ்நாட்டில் திருப்பூர், வேலூர், ராணிப்பேட்டை மற்றும் பிற தொழில்நகரங்கள் மாசடைந்தவையாக இருந்தாலும் ஈரோட்டில் புற்றுநோயின் பாதிப்பு அதிக அளவில்  உள்ளது.

9. 2025-ல் உத்தரபிரதேச மாநிலத்தின் கிராமப்புறங்கள், பீகார், மற்றும் மேற்கு வங்காளதிற்கடுத்து தமிழகத்தின்  நகர்ப்புறபகுதிகளில் புற்றுநோயின் பாதிப்பு அதிகமிருக்குமென்று கணிக்கப்பட்டுள்ளது.

10. சராசரியாக இந்தியாவில் 87 சதவீதத்திற்கும் அதிகமானவர்கள், கடைசி நிலைகளிலேயே புற்றுநோய்க்கான சோதனைகளுக்கு (மருத்துவமனைக்கு) வருகின்றனர். அவர்களில் மூன்றில் ஒரு பங்கினர் பல்வேறு காரணங்களுக்காக சிகிச்சையை தொடர்ந்து பெறுவதில்லை.

மிக முக்கியமாக மேற்குறிப்பிட்ட விகிதங்களைவிடவும் இந்தியாவில் மிகுதியாயிருப்பதற்கான சாத்தியக்கூறே அதிகம். நோய் பாதிக்கப்பட்ட மக்கள் முறையான சோதனை மற்றும் சிகிச்சைக்குள்ளாவதில்லை. மற்றும் மேற்கூறிய எண்கள் இந்தியாவின் அனைத்து மருத்துவமனைகளையும்  உள்ளடக்கியதாகஇருப்பது சந்தேகமே! நிச்சயமாய் அரசும், அது சார்ந்த நிறுவனங்களும் தற்போதே விழித்துக்கொண்டு புற்றுநோய் சோதனைகள் மற்றும் சிகிச்சைகளை இலவசமாக அல்லது மிகவும் குறைவான விலையில் வழங்க முன்வரவேண்டும். தற்போதைய சூழலில் ஒரு மேல்நடுத்தரவர்க்கக் குடும்பத்தில் ஒருவர் இந்தநோயால் பாதிக்கப்பட்டாலும் மிகப்பெரிய பொருளாதார சுமையே. மக்கள்தொகையில் பெரும்பகுதி ஏழை மற்றும் நடுத்தரவர்க்கம் நிறைந்த இந்தியாவில் பெருகும் புற்றுநோயால் நிச்சயம் கடுமையான விளைவுகளையே சந்திக்க நேரிடும்.

- Dr. T.K.B. காந்தி, PhD

(தொடரும்)

-----------------

GLOBOCAN project  (http://globocan.iarc.fr)

தேசிய புற்றுநோய் தடுப்பு மற்றும் ஆராய்ச்சி நிறுவனம் (http://www.nicpr.res.in, http://cancerindia.org.in)

Lancet Oncol. 2016;17(7):e272 

கேன்சர் (பகுதி 1)

காயப்பை ஒன்று சரக்குப் பலஉள
மாயப்பை ஒன்றுண்டு மற்றுமோர் பைஉண்டு
காயப்பைக் குள்நின்ற கள்வன் புறப்பட்டால்
மாயப்பை மண்ணா மயங்கிய வாறே.
- திருமந்திரம் (எட்டாம் தந்திரம், பாடல் 1)

இப்போதெல்லாம் புற்றுநோய் (கேன்சர்) என்ற வார்த்தையை அதிகம் கேட்கமுடிகிறது. ஒவ்வொருமுறையும் Social media-வில் யார்யாரோ கேன்சரைப் பற்றி அனுப்பிய தகவல்களை பார்த்தபோது பகீரென்றிருந்தது. அத்தனையும் முழு பொய்கள், அப்பட்டமான தகவல் பிழைகள், தவறான மருத்துவ ஆலோசனைகள். இன்றைய சூழலில் இவற்றை நம்புவதற்கான வாய்ப்புகளே அதிகம். அதனால், கேன்சரைப்பற்றி சராசரி மனிதன் புரிந்துகொள்வதற்க்கான ஒரு சிறிய தொடர் இது. இந்தத் தொடரில் கேன்சரைப் பற்றிய பொதுவான உண்மைகள் மற்றும் வதந்திகளைப்பற்றி பார்ப்போம். இந்தநோயைப்பற்றி தெரிந்துகொள்ள விரும்புகிறவர்களுக்கு உதவியாய் இருக்குமென்று நம்புகிறேன். ஏன் புற்றுநோயின் தாக்கம் இப்போது அதிகம்மென்பதை இந்தப் பதிவின் கடைசியில் பார்ப்போம். 

புற்றுநோயைப் பற்றி பார்ப்பதற்கு முன் இதன் வரலாறு தெரிந்து கொள்வது அவசியம். புற்றுநோய் நிச்சயம் தற்கால நோயல்ல. 5000 ஆண்டுகளுக்கு முன் வாழ்ந்த எகிப்தியர்கள் தங்கள் வரலாற்றின் பெரும்பகுதியை கற்களிலும் (hieroglyphics), ஓலை போன்றவொன்றிலும் (papyrus) பதிவு செய்தனர். புற்றுநோயைப் பற்றிய முதல் பதிவு 1600 BC-ல் (~3600 ஆண்டுக்கு முன்) பழமைவாய்ந்த ஓலையொன்றில் கண்டெடுக்கப்பட்டது. அதில் மார்பகப்புற்றுநோயென்றால் என்னவென்றும் (Breast cancer) அதற்க்கு எந்த சிகிச்சையும் இல்லையெனவும் குறிப்பிடப்பட்டிருக்கிறது. கிட்டத்தட்ட அதே காலத்தில் கிடைத்த இன்னொரு ஓலையில் கருப்பை புற்றுநோயையும் (Ovarian cancer) அதன் சிகிச்சை முறை பற்றியும் எழுதப்பட்டிருக்கிறது. அதே காலகட்டத்தில் இந்தியாவிலும் புற்றுநோயை அறிந்திருந்தனர். சித்த மருத்துவத்தில் 'புற்று' என்று புற்றுநோய் அறியப்படுகிறது (கறையான் புற்றைபோல வளர்ந்துகொண்டேயிருப்பதால் அந்தப்பெயர்). 

மருத்துவத்தின் தந்தை என அழைக்கப்படுபவர் Hippocrates (460-370 B.C) என்னும் கிரேக்க (Greek) மருத்துவர். புற்றுநோய்க்கட்டி மீது இரத்த நாளங்கள் பதிந்திருப்பது ஒரு நண்டுபோலிருப்பதை வைத்து Hippocrates புற்றுநோயை கார்கினோஸ் (Karkinos) என பெயரிட்டார். கிரேக்கத்தில் karkinos என்றால் 'நண்டு' என்று பொருள்.  

 Credit: Crab (https://www.pinterest.ie/pin/70368812906200613/)

கேன்சரைப்பற்றி Hippocrates-ன் பின்வரும் குறிப்புகள் மிக முக்கியமானவை:

"ஒவ்வொரு புற்றுநோயும் அது பாதிக்கப்பட்ட பகுதியில் மட்டும் நிற்காமல் உடம்பின் மற்ற பகுதிகளுக்கும் பரவுகிறது அதனால்  புற்றுநோயை ஆரம்ப கட்டங்களில் மட்டுமே குணப்படுத்த முடியும்" - Hippocrates (460-370 BC)

"புற்றுநோய் கடினமான கட்டியாயிருப்பதைவிட மென்மையான  கட்டியாயிருந்தால் நல்லது (Soft cancers are good but hard ones are bad)" - Hippocrates (460-370 BC)

- இன்றுவரை இவையிரண்டும் உண்மை.

கிரேக்க (Greek) மருத்துவ போதனைகள் ரோமர்களால் (Romans) தொடரப்பட்டன. ரோம மருத்துவர் Galen (131-200 AD), அவர்காலத்திலும் அதற்கு முன்னும் அறியப்பட்ட அனைத்து மருத்துவத் தகவல்களையும், பல ஆய்வுகளையும் தொகுத்திருந்தார். புற்றுநோய் உடலின் எந்தப் பகுதியிலும் தோன்றக்கூடும் என்றும் எடுத்துரைத்தார். குறிப்பாக மார்பகப் புற்றுநோய் (Breast cancer) பரவலாக இருந்ததாக குறிப்பிட்டிருக்கிறார்.  

அறுவை சிகிச்சை மட்டுமே புற்றுநோயை குணப்படுத்தக்கூடிய வாய்ப்பென்றும், அதுவும் நோயின் ஆரம்ப கட்டத்தில் மட்டுமே சாத்தியமென்றும் குறிப்பிட்டிருக்கிறார்.

Credit: © Royal College of Radiologists

அக்கால எகிப்தியர்களின் அரசவம்சத்தினர் மற்றும் முக்கிய அதிகாரிகள் தாங்கள் இறவாமலிருக்க பாதுகாக்கப்பட்ட mummy- க்களிலிருந்து நோய்களின் மதிப்புமிக்க தகவல்கல் கிடைக்கப்பெற்றன. மேலே இருக்கும் மண்டையோடு 1200 - 1100 BC காலத்திற்குட்பட்டது. இது நிச்சயமாக மூளையின் மேலிருக்கும் மெல்லிய தோலில் ஏற்பட்ட புற்றாக (meningioma) இருந்திருக்கவேண்டும்.

பிறகு, சுமார் 1500 வருடங்களுக்கு புற்றுநோயைப்பற்றிய தகவல்களில் பெரிய மாற்றமேதுமில்லாமல் இருந்தது. 18-ஆம் நூற்றாண்டில் வைரஸ்கள் புற்றுநோயின் காரணியென நம்பப்பட்டது. சில புற்றுநோய்கள் பரம்பரை நோயாகயிருக்கலாமென்றும் கருதப்பட்டது. 

19-ஆம் நூற்றாண்டில் அறுவை சிகிச்சை முறைகள் நல்ல வளர்ச்சிபெற்றன. புற்றுநோய்க்கான முதல் மருத்துவமனை இங்கிலாந்தில் துவங்கப்பட்டது. கதிரியக்க நோயறிதல் மற்றும் கதிரியக்க சிகிச்சை (radiodiagnosis and radiotherapy) கண்டறியப்பட்டது. 

20-ஆம் நூற்றாண்டில் மருத்துவத் துறை மிகப்பெரிய வளர்ச்சிகண்டது. குறிப்பாக மேம்படுத்தப்பட்ட மயக்க மருந்துகள் (anaesthetic techniques), நோய் கண்டறியும் நுட்பங்கள் (diagnostic methods), இலக்கு சிகிச்சை (targeted therapy), கீமோதெரபி (chemotheraphy) ஆகியவையுமடங்கும். 21-ம் நூற்றாண்டில் immunotheraphy, CAR T-cell therapy வளர்ச்சிகண்டது. மருத்துவத்தில் முன்பைவிட பலமடங்கு முன்னேற்றமடைந்துள்ளோம். 

 இதுவரை மனிதயினம் வாழ்ந்த காலங்களில் இப்போதுதான் மருத்துவத்தில் சிறந்த சிகிச்சை முறைகளைப் பெற்றுள்ளோம் (state of art facilities available globally), மிகமுக்கியமான நோய்களை அழித்துள்ளோம். ஆனால் இன்னும் மருத்துவத்தில் இன்னும் மிகநீண்ட தூரம் செல்லவேண்டும், ஏனென்றால் இன்னமும் புற்றுநோயை முற்றிலும் குணமாக்கமுடியவில்லை. இன்னமும் பல இடங்களில் Hippocrates மற்றும் Galen-னின் கணிப்பே சரியாகயிருக்கின்றது, இது மிகப்பெரிய துரதிஷ்டம்!

ஏன் புற்றுநோய் இப்போது பரவலாகயிருக்கிறது:

1. நீளாயுள் (Increased life expectancy):

ஒரு சராசரி மனிதனின் ஆயுட்காலம் கணிசமாக அதிகரித்துள்ளது. தற்போது இந்தியாவில் ஒருமனிதனின் சராசரி ஆயுள் 69 ஆண்டுகள். ஆனால் 1947-ல் அது வெறும் 32 ஆண்டுகள் மட்டுமே, இது பண்டைய எகிப்திய காலத்தைவிட குறைவு (39 ஆண்டுகள்). பல நோய்களின் காரணமாக முன்னர் மக்கள் இறந்தனர் (சிறுநீரக நோய்கள், பிளேக், காலரா, மலேரியா, காசநோய் மற்றும் பல). இவற்றில் அநேகமானவை தற்போது குணப்படுத்த அல்லது கட்டுப்படுத்தப்பட்டுள்ளது. இதைத்தாண்டி மனிதர்கள் இறக்க இன்னும் பல காரணங்களிருந்தன உதாரணமாக, ஊட்டச்சத்து குறைபாடு இப்போது கணிசமான மக்கள்தொகை ஊட்டச்சத்து மிக்க உணவை பெறமுடிகிறது. தற்போதைய கால கட்டத்தில் மனிதன் இரண்டு மிகப்பெரிய சவால்களை சந்திக்கவேண்டியுள்ளது. 1. இருதய சம்பந்தப்பட்ட நோய்கள் 2. புற்றுநோய். 

இவை இரண்டும் வயது சம்பந்தப்பட்ட நோய்களாகும். பெரும்பாலான இருதய நோய்கள் வயதான மக்களால் தவிர்க்க முடியாதவை. எனவே மனிதன் நீண்ட காலம் வாழ்ந்தால் இந்த நோய்களை சந்தித்தேயாகவேண்டும்.

2. மருத்துவ பரிசோதனை (Clinical diagnosis): 

தற்போதைய சிறந்த மருத்துவ பரிசோதனைகள் புற்றுநோயை துல்லியமாக கண்டறிய உதவுகிறது. உதாரணமாக இமேஜிங் நுட்பங்கள் (imaging technologies - X-ray, PET-CT scans), எண்டோஸ்கோபிக் நுட்பங்கள் (endoscopic examinations), உயிர்த் திசு ஆய்வு (biopsy), செல்களை பகுத்துப்பார்க்கும் முறை (histological and cytological investigations) புற்றுநோயை துல்லியமாக கண்டறிய உதவுகின்றன. கடந்த நூற்றாண்டின் இறுதியில் ஒரு பொதுவான நுரையீரல் நோய் - காசநோய். ஆனால், காசநோய் கண்டுபிடிக்கப்பட்ட பலர்  உண்மையில் நுரையீரல் புற்றுநோயால் பாதிக்கப்பட்டிருந்தனர். 

3. புற்றுநோயூக்கி (Carcinogen):

கண்டிப்பாக புற்றுநோய் அதிகரித்ததன் ஒரு முக்கியக்காரணம் புற்றுநோயூக்கிகளை (Carcinogen) வலுக்கட்டாயமாகவோ, தற்செயலாகவோ எதிர்ப்படநேர்வது. ஏடுத்துக்கட்டாக புகையிலை (tobacco), கல்நார் (asbestos), கதிர்வீச்சு (radiation). இவையனைத்தும் நிச்சயம் நாகரிக மனிதனின் விளைவுகள்தான். புற்றுநோயூக்கியாகப் பரிந்துரைக்கப்பட்ட பொருட்களின் மிகப்பெரியப்பட்டியல் உள்ளது, அவை பல முக்கிய அறிவியல் சோதனைக்கு உட்படுத்தப்படவேண்டியவை. நவீன நாகரிகம் பல புற்றுநோயூக்கிகளை அதிகரித்திருக்கிறது, இதனால் புற்றுநோயும் அதிகரித்துள்ளது.

4. வாழ்வு முறை (Life style):

உணவுகளில் சிவப்பு இறைச்சி மற்றும் பதப்படுத்தப்பட்ட இறைச்சிகளை (diets high in red and processed meats) அதிகம் சேர்த்துக்கொள்ளுதல், அதிக எடை மற்றும் உடல் பருமனாயிருத்தல் (overweight and obesity), மது அருந்துதல் (alcohol consumption), பாப்பிலோமாவைரஸ் தொற்று (HPV infection), குறைந்தகாலம் தாய்ப்பால் கொடுப்பது (women breastfeed less) போன்றவற்றாலும் கணிசமாக  புற்றுநோய் அதிகமாகக் காணப்படுகிறது.

- Dr. T.K.B. காந்தி, PhD

(தொடரும்)

பரிணாமம்: Natural Selection (இயல் தெரிவு)

தான் வாழும் சூழலில் தன்னை தக்கவைத்துக் கொள்ளும் ஒரு தனி விலங்கு/இனம்/குழுவிற்கு அதிகமான சந்ததிகள் இருக்கும் என்று டார்வினும், வாலஸும் தான் முதலில் கண்டறிந்தனர். எடுத்துக்காட்டாக, சில சமயம், சில தனிச்சை மாற்றங்கள் (mutations) சில உயிரினங்களின் வாழ்நாளை அதிப்படுத்துகிறது. அதாவது மற்ற முயல்களை விட வேகமாக ஓடக்கூடிய ஒன்று எளிதில் தன் எதிரியிடமிருந்து தப்பி விடுகிறது, மற்ற தாவரங்களை விட அதிகமான சக்தியை சூரியனிடமிருந்து கிரகிக்கும் திறன் கொண்டதால் பாசியினம் (algae) வேகமாக வளர்கிறது. ஒரு உயிரியின் வாழ்நாள் அதிகரிக்கும் போது தானாகவே அதன் இனமும் பெருகுகிறது. 

“…as natural selection acts by competition for resources, it adapts the inhabitants of each country only in relation to the degree of perfection of their associates” (Charles Darwin, On the Origin of Species, 1859).

Natural selection-ஐ விளக்கமாகப் பார்க்க இங்கிலாந்தில் நடந்த ஒரு சம்பவத்தை பார்ப்போம்:

Peppered moths (Photo courtesy: © Wikimedia/ Olaf Leillinger)

கி.பி. 1800-களில், இங்கிலாந்து அதீதமான தொழில் வளர்ச்சி கண்டது. அப்போது தொழிற்சாலைகள் வெளியிட்ட மாசுபட்ட புகையினால் சுமார் 70 அந்துப்பூச்சி (moth) இனங்கள் பாதிக்கப்பட்டன, அதில் அதிகம் ஆராயப்பட்டது மரங்களில் காணப்படும் Peppered moth எனும் அந்துப்பூச்சி. இந்த பூச்சியினத்தில் பல வேறுபட்ட குழுக்கள் காணப்பட்டன. குறிப்பாக வெள்ளை மற்றும் கருப்பு நிற பூச்சிகள்.

Peppered moths on tree (Photo courtesy: © Wikimedia/ Martinowksy)

கி.பி. 1800-களுக்கு முன்னால் வெள்ளை நிறபூச்சிகளே அதிகமிருந்தது, சொற்பமாகவே கருப்பு நிறப் பூச்சிகளிருந்தன. தொழிற்சாலைகளின் கறுப்புப்புகையால் அநேகமான இடங்கள் கார்பன் படிந்து கறுப்புநிறமாக மாறின. மரங்களிலும் கறுப்புநிறம் படிந்தது. பறவைகளுக்கு உணவாகவும் இந்த பூச்சிகள் இருந்தது. மரங்களின் கறுப்பு நிறமாற்றத்தால் அதன்மேல் வாழ்ந்து வந்த வெள்ளை நிற பூச்சிகள் தனித்து தெரிந்தன. இதனால் பறவைகளால் இந்த வெள்ளைப் பூச்சிகளை எளிதில் கண்டுபிடித்து இரையாக்க முடிந்தது, கறுப்பு நிறப்பூச்சிகள் தப்பித்துக்கொண்டன. சில காலம் கடந்தபின் வெள்ளைநிறப் பூச்சிகளின் எண்ணிக்கைகள் பலமடங்கு குறைந்துவிட்டது. தன்னை உண்ணும் பறவைகளிடமிருந்து தப்பித்துக் கொண்டதால் கறுப்பு நிறப்பூச்சிகள் பலமடங்கு பெருகிவிட்டன. Natural selection-ஐ விளக்குவதற்கு இது ஒரு சிறந்த எடுத்துக்காட்டு.

Natural selection (modified from the original photo. Courtesy: © Univ.Calif.Berkely)

”I have called this principle, by which each slight variation, if useful, is preserved, by the term Natural Selection.” (Charles Darwin, On the Origin of Species, 1859).

இப்படிப் பல வகையில் எல்லா நேரங்களிலும் இயற்கை எப்போதும் தேர்வு செய்துகொண்டே இருக்கிறது. சூழ்நிலைக்கு தன்னை தப்பவைத்துக்கொள்ளும் குழுவோ/உயிரோ மட்டும்தான் நிலைத்துநிற்கும். ஒரு உயிரினத்தில் பல வேறுபாடுகள் கூடிய குழுக்களில் தப்பித்துக்கொள்ளும் குணத்தை ஒரு உயிரோ/குழுவோ தேர்ந்தெடுக்கமுடியாது முக்கியமாக அதை இயற்கைதான் தேர்வுசெய்யும் இதைத்தான் இயல் தெரிவு (Natural selection) என்கிறோம். பூமியில் உயிர் தோன்றிய காலம் முதலே நடந்துவந்த இயற்கையின் எல்லா தேர்விலும் தேர்ந்தெடுக்கப்பட்ட உயிரினங்கள் தான் இன்றுவரை வாழ்ந்து வருகின்றன. ஒரு செல் உயிரிலிருந்து இப்போது இருக்கும் உயிர் வரை ஏற்பட்ட மாற்றங்கள் தான் பரிணாமம்.

ஒரு உயிர் பரிணாமம் அடைந்துவிட்டது என்று எந்த உயிரையுமே சொல்ல முடியாது ஏனென்றால் பரிணாமம் என்பது எப்பொழுதும் நடந்துகொண்டேயிருக்கும் ஒரு செயல், இந்த நொடியும் இயற்கையின் தேர்வு நடந்துகொண்டேயிருக்கிறது. நாம் இப்போது மனிதனாயிருக்கிறோம் என்று வேண்டுமானால் சொல்லிக்கொள்ளலாம்.

Phylogenetic tree (Image courtesy © Open University; பெரிதாய் பார்க்க படத்தை க்ளிக் செய்யவும். மேலும் விளக்கமான படத்துக்கு இங்கு செல்லவும்)

ஆதிகாலத்திலிருந்த ஒற்றை செல் உயிர் எப்படியெல்லாம் பரிணமித்து புழு, பூச்சி, மனிதன் என பலகோடி உயிர்களாய் பரிணமித்திருப்பது மிகவும் ஆச்சர்யமான விஷயம். தனிச்சை மாற்றங்கள் (mutation) எப்போதும் தற்செயலாகவே (chance) நடக்கின்றன. ஆனால், அதனால் உடம்பில் ஏற்படும் மாற்றங்களில் எந்த மாற்றங்களை தக்கவைக்க வேண்டுமென்பது தான் Natural Selection (இயல் தெரிவு). தனிச்சை மாற்றங்களைப் போல் Natural Selection என்பது தற்செயலாக (chance) நடக்காது.

- (தொடரும்)

பரிணாமம்: Natural variation (இயல் வேறுபாடு)

Natural Variation என்பது ஒரே உயிரினத்தில் காணப்படும் பல்வேறு மாற்றங்கள் மற்றும் வேறுபாடுகள். இவ்வகை மாற்றங்கள் இயற்கையாக அனைத்து உயிரினங்களிலும் காணப்படும். பெரும்பாலும் இந்த மாறுபாடு அவற்றை பாதிப்பதில்லை, உதாரணமாக மனிதர்களில்,

1. கண் நிறம் (கருப்பு, பழுப்பு, நீலம், பச்சை…).
2. ரோமத்தின் நிறம் (கறுப்பு, செந்நிறம், பழுப்பு…) போன்றவை. கீழுள்ள படத்தில், ஒரே வகை பூச்சியில் காணப்படும் வேறுபாடுகள்.

(Photo courtesy: © Univ.Calif.Berkeley)

இதுபோன்ற வேறுபாடுகள் உயிரினங்களின் ஜீனோம் (Genome)-களில் நடக்கும் தனிச்சை மாற்றங்களினால் ஏற்படுகிறது. ஜீனோம்களில் ஏற்படும் மாற்றங்கள்தான் நம் உடம்பு செல்களிலும், உடம்பிலும் மாற்றங்களை ஏற்படுத்துகின்றன.


ஒரு உயிரினத்தின் ஒட்டுமொத்த மரபுத் தகவல்கள் தான் Genome (ஜீனோம்) என்கிறோம். ஜீனோம்களின் இயக்கக்கூறு (functional unit) தான் Genes (ஜீன்கள்), (ஜீன்களற்ற இடங்களும் ஜீனோம்களில் உண்டு - intron). பெரும்பாலான உயிரினங்களின் ஜீனோம் டி.என்.ஏ (D.N.A)-வால் ஆனது. இந்த டி.என்.ஏ அமைப்பில் திடீரென்று தனிச்சையாக ஏற்படும் மாற்றங்களைத் தான் mutation (தனிச்சை மாற்றங்கள்) என்கிறோம். 

(Photo courtesy: The Diabetes Web)

இப்படிப்பட்ட தனிச்சை மாற்றங்கள் நம் உடம்பு செல்லில் அன்றாடம் நடந்துகொண்டேவும் இருக்கிறது. புறஊதா (Ultra violet) கதிர்கள், கதிர் வீச்சு (Radiation), மிகவும் ஆபத்தான வேதிப்பொருட்கள் போன்றவைகளாலும் ஏற்படுகின்றன. இவ்வகை தனிச்சை மாற்றங்கள் நம் உடம்பு செல்களிலோ (somatic mutations) அல்லது விந்து (Sperm), நாதத்திலோ (Egg) நடந்தால் அவை சந்ததிகளுக்கும் கடத்தப்படும். தனிச்சை மாற்றங்களால் நன்மையோ, தீய விளைவுகளோ அல்லது ஒன்றுமே நடக்காமலும் போகலாம்.


தனிச்சை மாற்றங்கள் உடம்பு செல்களில் நடந்தால் மாற்றம் ஒன்றும் நேராது அல்லது நோய்களை ஏற்படுத்தலாம். தனிச்சை மாற்றங்கள் விந்து-நாதத்தில் ஏற்பட்டால் அவை மேலே சொன்னது போல் ஒரு மாற்றத்தையும் ஏற்படுத்தாமலும் போகலாம் அல்லது சந்ததிகளுக்கு நோயை உண்டுபடுத்தலாம் அல்லது நன்மை செய்யலாம்.


(தொடரும்)

பரிணாமம்: டார்வின் மற்றும் வாலஸ்

சார்லஸ் டார்வின் (Charles Darwin, 1809-1882), தனது 5 வருட கடற்பயணத்தில் தொகுத்த ஆதாரங்கள் அனைத்தையும் வைத்து ஆராய்ச்சி செய்துகொண்டிருந்தார். 1830-களின் கடைசியில் பரிணாமக் கோட்பாடு ஒன்றை உருவாக்கி அதை பல்வேறு காரணங்களால் வெளியிடாமலிருந்தார். கடவுள் மனிதனை நேரடியாகப்படைத்தார் என்று நம்பிக்கொண்டிருந்த காலமது அதனால் தன் கருத்தை நிரூபிக்க தகுந்த ஆதாரங்களை சேகரித்துக்கொண்டிருந்தார். அதற்காக சுமார் 20 வருடங்கள் ஆரய்ச்சி செய்தார். அதேகாலத்தில், ஆல்ஃப்ரெட் வாலஸ் (Alfred Wallace, 1823-1913) என்பவரும் தனியாக பரிணாமத்தைப் பற்றி ஆராய்ச்சி செய்து கொண்டிருந்தார்.

ஆல்ஃப்ரெட் வாலஸ் (Photo courtesy: © University College London)

சார்லஸ் டார்வின் (Photo courtesy:  © Flickr.com/serkel)

இவர்கள் இருவருக்கும் பொருளியல் (Economics) மேதையான தாமஸ் மால்தஸ் (Thomas Malthus, 1766-1834) 1797-ல் வெளியிட்ட An Essay on the Principle of Population as it affects the Future Improvement of Society-ல் மக்கட்தொகை பெருக்கத்தையும் உணவு தட்டுப்பாட்டையும் இணைத்து தாமஸ் தெரிவித்த கருத்துதான் பரிணாமம் பற்றிய தங்கள் கருத்துக்கு தூண்டுதலாக அமைந்தது. இருவரும் (தனித்தனியே) ஒரு உயிர் பரிணமிப்பதற்கு இயற்கையை சார்ந்த காரணங்கள் இருப்பதாக நம்பினர். இந்த முறையை இயல் தெரிவு (Natural Selection) என்று டார்வின் அழைத்தார். டார்வினின் ஆராய்ச்சிக்கு வாலஸ் பறவைகளை கொடுத்து உதவினார். 


1858-ல் வாலஸ் தன் பரிணாமம் பற்றிய கோட்பாடை பிரசுரிப்பதற்கு முன் அதை டார்வினுக்கு அனுப்பி அவரின் கருத்துகளை கேட்டார். வாலஸின் ஆராய்ச்சி முடிவுகள் டார்வினுக்கு மிகுந்த அதிர்ச்சியையும் ஆச்சர்யத்தையும் தந்தது. ஏனென்றால் அது டார்வினின் கருத்துக்களை அப்படியே ஒத்திருந்தது. பிறகு, 1858-ல் டார்வின் மற்றும் வாலஸின் கருத்துக்களை லண்டனிலுள்ள லின்னியன் கழகத்தில் (உலகின் முக்கியமான இயற்கை வரலாறு பற்றிய ஆராய்ச்சிக் கழகத்தில்) ஒன்றாக வழங்கினர். அதற்குப்பின் டார்வின் அதை ஒரு புத்தகமாக வெளியிடுவதற்கான வேலையில் இறங்கினார், வாலஸ், தன் உயிர்புவியியல் குறித்த ஆய்வுக்கான பயணத்தை தொடர்ந்தார். 1859-ல் டார்வின் On the Origin of Species by Means of Natural Selection, or the Preservation of Favoured Races in the Struggle for Life என்ற புத்தகத்தை வெளியிட்டார். 

(Photo courtesy: © WikiMedia)

வழக்கம்போல இந்த புத்தகத்திலுள்ள கருத்துக்களை முதலில் விஞ்ஞானிகள் ஏற்க மறுத்தனர், பின்னர் பல விவாதங்களுக்குப் பிறகு உயிரினங்கள் பொதுவான மூதாதைகளிலிருந்து பரிணமித்தன என்பதை அநேகமான விஞ்ஞானிகள் ஏற்றுக்கொண்டனர். ஆனால், டார்வின் சொன்ன Natural Selection-ஐ பல காலம் வரை ஏற்க மறுத்தனர். 20-ம் நூற்றாண்டில், ஜீன்கள் மற்றும் தனிச்சை மாற்றங்களை (mutation) கண்டுபிடித்தபின் பரிணாமத்திற்கு Natural Selection தான் காரணமென்பது தவிர்க்க முடியாததாகிவிட்டது. இன்றுவரை இந்த புத்தகம்தான் அறிவியலில் அதிகம் படிக்கப்பட்ட, மிகுந்த செல்வாக்கான மற்றும் பிரபலமான புத்தகம். டார்வினுக்கு முன்னரே மனிதன் குரங்கிலிருந்து வந்தான் என்று பலர் சொல்லியுள்ளனர் (7-ம் நூற்றாண்டில் கிரேக்க தத்துவர்கள் Anaximander மற்றும் Empedocles போன்றோர்) ஆனால், டார்வினை பரிணாமத்திற்காக கொண்டாடுவதற்குக் காரணம் இவர் தான் அறிவியல் பூர்வமாக பரிணாமத்தை விளக்கி அதற்கு பல்வேறு ஆதாரங்கள் கொண்டு நிரூபித்தார். ஆனால், பரிணாமம் சார்பாக டார்வினுக்கு கிடைத்த அங்கிகாரம் வாலஸுக்கு இன்னும் கிடைக்காதது மிகவும் துரதிர்ஷ்டவசமானது.


Natural Selection (இயல் தெரிவு) & Natural variation (இயல் வேறுபாடு):
பல்வேறு உயிரினங்களை ஆராய்ந்த டார்வின், ஒவ்வொரு இனத்திலும் (Species) வேறுபாடு (variation) கொண்ட பல்வேறு குழுக்கள் இருக்கின்றன என்றும், இந்த குழுக்களுக்குள் உணவுக்கு, நீருக்கு, மற்றும் எதிரிகளிடமிருந்து காத்துக்கொள்ள பாதுகாப்பான இடம் போன்றவைகளுக்கு எப்போதுமே போட்டியிருந்துக் கொண்டேயிருக்கிறது என்றார். இது போன்ற உயிர்ப் போராட்டத்தில் பிழைத்துக் கொள்ளும் ‘தனிப்பட்ட குழுக்கள்’ தங்கள் ‘தனிப்பட்ட குணங்களை’ (heritable traits) தங்கள் சந்ததியினற்கு கடத்துகின்றன. அதனால், இந்தப் போராட்டத்தில் பிழைத்துக்கொள்ள முடியாத குழுக்களுக்கு இருப்பதைவிட பிழைத்துக் கொள்ளும் இந்த குழுக்களுக்கு அதிகமான சந்ததிகள் இருக்கும். நீண்ட காலத்துக்கப்பறம் பிழைத்துக் கொள்ளும் குழுக்கள் மட்டும் நிலைத்து நிற்கும் (Survive), மற்ற குழுக்கள் அழிந்துவிடுகின்றன (Extinct) என்றார். இப்படிப்பட்ட இயற்கையின் தேர்வுதான் Natural Selection.


குறிப்பு:
அநேகமானோர் நினைப்பது போல் ‘தக்கன பிழைக்கும்’ (survival of the fittest) என்று டார்வின் தன் புத்தகத்தில் எழுதவேயில்லை. அப்படி ஒர் வாக்கியத்தை டார்வினின் புத்தகத்தைப் படித்தபின் ஹேர்பர்ட் ஸ்பென்ஸர் (Herbert Spencer, 1820-1903) என்பவர் தான் அறிமுகப்படுத்தினார்.

-தொடரும்
-

பரிணாமம்

உலகெங்கிலுமுள்ள அநேக உயிரியல் ஆராய்ச்சியாளர்களின் கனவு  பரிணாம ஆராய்ச்சியைப் பற்றியதாகத்தான் இருக்கும். ஆனால், அறிவியலில் அதிகம் தவறாக புரிந்துக்கொள்ளப்பட்ட கருத்தும் பரிணாமம் தான். பரிணாமத்தை பற்றிய ஆராய்ச்சியை சார்லஸ் டார்வின் (Charles Darwin; 1809 –1882) ‘On the Origin of Species’ எனும் புத்தகமாக 1859-ல் வெளியிட்டார். பிறகு இந்த புத்தகம் தான் பரிணாமத்தைப் பற்றிய ஆராய்ச்சியின் மூலப்புத்தகமாகியது. டார்வினுக்கு முன் பல ஆய்வாளர்கள் தன் பரிணாமக் கோட்பாடுகளை முன் வைத்தனர்.

குறிப்பாக லமார்க் (Lamarck; 1744 - 1829) என்னும் பிரஞ்சு ஆய்வாளரின் கோட்பாடு (Lamarkism) மிகுந்த விமர்சனத்துக்கு உள்ளானது (பரிணாமத்தைப் பற்றி பகிரங்கமாக தன் கோட்பாடுகளை முதன் முதலில் வெளியிட்டதும் இவரே). அவர், ”ஒரு உயிரி தன் உறுப்பை (குணம்) தனக்கு சாதகமாக மாற்றிக் கொள்ளக்கூடும் அல்லது புதிய உறுப்பை (குணம்) பெற்றுக்கொள்ளக்கூடும் அல்லது தனக்குத் தேவையில்லாத ஒரு உறுப்பை (குணம்) இழக்கக்கூடும் - இந்த குணங்களை சந்ததிகளுக்கும் கடத்தக்கூடும் (inheritance) என்றும் அறிவித்தார் (inheritance of acquired characteristics as creatures adapted to their environments)”.  

Lamarck in 1821. From © Desmond 1989

உதாரணமாக, ஒட்டகச்சிவிங்கி ஒரு காலத்தில் ஆடு போன்றதொரு விலங்காய் இருந்திருக்கலாம், அது மரங்களின் மேல் நுனியிலுள்ள இலைகளை உண்பதற்காக அதன் கழுத்து நீளமாக வளர்ந்திருக்கூடும் என்பதுதான் அது. அதாவது, ஒட்டகச்சிவிங்கி கழுத்து அதன் விருப்பத்தினால் பல தலைமுறைகளின் பின் நீளமாகியிருக்கலாம்.  ஆனால் இதற்கு fossil தடயங்கள் மற்றும் போதிய ஆதாரங்கள் ஏதுமில்லை. 

© Dennis O'Neil, Palomar College.

மேலும் இவரின் கோட்பாட்டை சரி பார்க்க எலிகளின் வாலை 22 தலைமுறைகள் வெட்டிவிட்டனர், 22 தலைமுறைக்கப்பால் வால் வெட்டிவிடப்பட்ட எலிக்கு பிறந்த எலிக்கும் வாலிருந்தது - லமார்க்கின் கூற்றுப்படி பார்த்தால் பல தலைமுறைக்குப் பின்னால் பிறக்கும் எலிகளுக்கு வாலில்லமல் இருந்திருக்க வேண்டும். மேலும் இவரின் கோட்பாட்டில் பல சிக்கல்கள் இருந்தன. இவரின் கோட்பாடின்படி பார்த்தால் ஒரு பளு தூக்கும் விளையாட்டு வீரரின் பிள்ளைகளுக்கும் தசை வலிமையாய் இருக்கவேண்டும் - ஆனால் அது சாத்தியமில்லை. 19-ம் நூற்றாண்டின் ஆரம்பத்தில் லமார்கிஸம் மிகப் பிரபலமாக இருந்தது, பிறகு டார்வினின் இயற்கைத் தேர்வு கோட்பாடே (Theory of Natural selection) பெரிதும் ஏற்றுக்கொள்ளப்பட்டது.

© Wikimedia.

மனிதன் குரங்கிலிருந்து வந்தான் என்னும் கருத்து அனைவரும் அறிந்ததே. குரங்கின் ஜீனோம்களில் ஏற்பட்ட தனிச்சை மாற்றங்களின் (mutations) ஒட்டு மொத்த கூட்டு பல தலைமுறைகளை கடந்தபின் குரங்கை மனிதனாக உருமாற வைத்தது. மிக முக்கியமாக இந்நிகழ்வு குரங்கின் விருப்பத்தினால் ஏற்படவில்லை என்பதே உண்மை.
 

- தொடரும்.

தியாகத்தின் அறிவியல்

சார்ல்ஸ் டார்வின் (1809-1882) தன் The Origin of Species-ல் 'தக்கன பிழைக்கும்' அதாவது உயிரினங்கள் வாழ்வதற்கு ஒன்றோடொன்று போட்டி போட்டுக் கொள்கின்றன, அதில் தகுதியானவையே வாழும் என அறிவித்தார். இந்த கட்டுரை அதைப்பற்றியல்ல. அவர் விவரிக்கத் தடுமாறிய தியாகத்தை (sacrifice)-ப் பற்றியது. அதாவது, தக்கன பிழைக்குமென்றால் ஒரு உயிர் மற்றோன்றிற்க்கு ஏன் உதவவேண்டும்?, ஒத்துழைக்கவேண்டும்? அல்லது தியாகம் செய்ய வேண்டும்? டார்வினால் விவரிக்க மிகவும் தடிமாறிய விசயம்தான் இந்த ’தியாகம்.’


வேலைகாரத் தேனி அதன் கூட்டத்தின் நன்மைக்காக கடினமாக உழைக்கக்கூடியது ஆனால் அதனால் இனப்பெருக்கம் செய்ய முடியாது, பிறகேன் யாருக்காகவோ இப்படி உழைக்க வேண்டும்? இவ்வகை உயிரிகளை (social organisms) தன்னால் புரிந்துகொள்ள முடியவில்லையெனவும் தன் கோட்பாட்டால் இவைகளை விவரிக்க முடியாதெனவும் டார்வின் தன் The Origin of Species-ல் சொல்லியிருக்கிறார். இப்படிப்பட்ட தியாகங்களால் தான் பரிணாமத்தில் பல முக்கிய மாற்றங்கள் ஏற்ப்பட்டிருக்கின்றது. அந்த தேனியைப் போலவே, ஒரு வகை வேலைகார எறும்பாலும் இனப்பெருக்கமுடியாது ஆனால் அது அதன் ராணியின் குழந்தைகளை பேணி வளர்க்கும். இந்த மூன்று பில்லியன் வருடங்களில் ஒரு செல் உயிரியிலிருந்து ஆறு அறிவு மனிதனாக மாற இயற்கைத் தேர்வும் (Natural selection), மரபணுப்பிறழ்வும் (Mutation) மட்டுமே காரணமாக இருக்க முடியாதெனவும் இதுபோன்ற தியாகங்களும் மிக முக்கியமென சொல்கிறார் மார்டின் நெளக் (Harvard University, USA). நீங்கள் Discovery, NGC, AP-ல் பார்க்கும் உயிரைப் பணையம் வைத்து தன் குட்டியைக் காப்பாற்றும் மானும், சின்னம்மையில் நீங்கள் படுத்தால் மாரியம்மனுக்கு விரதமிருக்கும் உங்கள் அம்மாவும் தியாக உருவாக மாறி உங்களை காப்பாற்ற முயலும் குடும்ப பந்தங்களாலும், பிறர்க்காக விட்டுக்கொடுத்து வாழ்வதன் மூலமாகவும் ஒரு இனத்தின் வளர்ச்சி ஓங்கும்மென்றும் இது போன்ற குடும்பங்களை Natural selection விரும்புமென்றும் டார்வின் சொல்லியிருக்கிறார்.


டார்வின் கொடுத்த இந்த துப்பை வைத்துக்கொண்டு வில்லியம் ஹேமில்டன் (1936-2000) என்னும் இங்கிலாந்தைச் சார்ந்த பரிணாம ஆராய்ச்சியாளர் ’தியாக’ங்களை Inclusive fitness எனும் சமன்பாட்டில் கொண்டுவந்து டார்வினின் எதிர்கொண்ட பிரச்சினைக்கு விடை கொடுத்தார். அதாவது, உங்கள் உறவுக்காரர்கள் உங்களையொத்த குணமுள்ளவர்கள் (எதோ ஒரு வகையிலாவது – நல்லதோ/கெட்டதோ) அந்த குணமே உங்கள் குடும்பத்தில் மேலோங்கியிருக்கும். அதனால் ஒரு குடும்பத்தில் ’தியாகி’கள் சில இருந்து தானழிந்து தன் குடும்பத்தை வாழையடி வாழையாக பெருகுவர். குடும்ப உறுப்பினர்கள் பெருகுவார்கள், அந்த குடும்பம் பெருகுகிறது. இந்த குடும்பம்போல் தான் ஒவ்வொரு உயிரிக்கும். எடுத்துக்காட்டிற்க்கு, ஒரு வகையான அணில் தன்னை இரையாக்கவரும் விலங்கைப் பார்த்ததும் கத்தி தன் சக அணில்களைக் எச்சரிக்கும், அதன் சப்தத்தில் அந்த விலங்கிடம் தான் சிக்கிக்கொள்ளும் – இந்த ’தியாக’ அணில் இரையாகக்கூடும் ஆனால் மற்ற அணில்கள் காப்பாற்றப்படும், இப்படி சில தியாகிகள் இறந்தாலும் அந்த குழுமத்திற்க்கு கடைசியில் நன்மையே. மாறாக, அந்த அணில் தான் மட்டும் தப்பி இருந்தால் அந்த குழு சில அணில்களை இழந்திருக்கும். இப்படி அந்த குழு எண்ணிக்கை குறைந்துகொண்டே போயிருக்கும். ஒரு உயிரின்/குழுவின்/குடும்பத்தின் பரிணாம வெற்றி அதன் நகல்களின் எண்ணிக்கையில்தான் உள்ளது அதனால் உதவி/தியாகத்தினால் ஒரு உயிரின்/குழுவின்/குடும்பத்திற்கோ எந்த கெடுதலும் எற்படாது மாறாக நன்மையே ஏற்படும். 


மேலே குறிப்பிட்ட அனைத்தும் ஒரு குழுவிற்கோ, இனத்திற்கோ, உயிரிற்கோ பொது. இப்படியான sacrifice, cooperation, altruism போன்ற குணங்கள் பரிணாம வளர்ச்சியில் ஒரு உயிரி தன் பரிணாம வெற்றிக்காக அந்தந்த உயிரினங்களில் இயற்க்கை ஏற்ப்படுத்தியுள்ளது என்பதைத் தாண்டி நம்மால் அவற்றை இன்னும் புரிந்து கொள்ள முடியவில்லை.


டிஸ்கி:
நீ கவிதையெழுதினா யாருக்கும் ஒரு பைசா பிரயோஜனமில்ல, உருப்படியா எதுனா எழுதுனா தேவலாமென்று சொன்ன நண்பர்களுக்காக. இது உபயோகமானதான்னு தெரியல, ஆனா இந்த வருடம் டார்வினின் 200-வது பிறந்த வருடம் மற்றும் அவர் எழுதிய The Origin of Species-ன் 150-வது ஆண்டு விழாங்கறதுனால இது.


References:
1. Darwin, C. R. 1859. On the origin of species by means of natural selection, or the preservation of favoured races in the struggle for life. London.
2. Science (2009) Vol. 325. no. 5945, pp. 1196 – 1199.
3. Dawkins, R. 1976. The Selfish Gene. Oxford. London
4. http://en.wikipedia.org/wiki/Inclusive_fitness

Photo courtesy: sciencemag.org

-