கூர்தலறம்

ஜீவசலனம்

2011-11-12T12:11:00.001+05:30

(Photo courtesy: © Gregory Reade sculpts)

பேருருவ அவமானம்

தாங்காமல்
ஒவ்வொரு முறையும்
விநோதமானவொரு சூன்யத்தில்
நெடுந்தொலைவு கடந்தபின்னும்
ஒருக்களித்து சாய்ந்து
கண்ணீர் கொட்டி

காத்திருக்கிறதென் ஜீவசலனம்.

என் மூச்சுக் காற்றில்
ஊளையிட்டு அலையுமது

விழுங்கியே வைத்திருக்கிறது
எனையும், இன்னபிற
எனைப் பற்றியவைகளையும்.

ஒவ்வொரு முறையும்
முளைத்து,

எத்தனித்து,
விடைத்துப் படருமென் எலும்புகளை

உருக்கி, கூழாக்கி,
கூப்பிடுதூரத்தில் புதைத்து, மக்கச்செய்யும் அது
என் நிழலில் ஒளிந்து
அடுத்த சந்தர்பம் எதிர்நோக்கிக்

கடுந்தவமிருக்கும்!

எஞ்சியிருக்கும் நம்பிக்கையிழப்பின்

ஒட்டுமொத்த சூன்யத்தில்
அகாலமாய் இறக்குமென்னால்
ஒரு நொடி மெளனத்தை கூட
அஞ்சலியாக்க முடியவில்லை

எனக்காக!

பரிணாமம்: Natural Selection (இயல் தெரிவு)

2011-06-06T09:52:00.004+05:30

தான் வாழும் சூழலில் தன்னை தக்கவைத்துக் கொள்ளும் ஒரு தனி விலங்கு/இனம்/குழுவிற்கு அதிகமான சந்ததிகள் இருக்கும் என்று டார்வினும், வாலஸும் தான் முதலில் கண்டறிந்தனர். எடுத்துக்காட்டாக, சில சமயம், சில தனிச்சை மாற்றங்கள் (mutations) சில உயிரினங்களின் வாழ்நாளை அதிப்படுத்துகிறது. அதாவது மற்ற முயல்களை விட வேகமாக ஓடக்கூடிய ஒன்று எளிதில் தன் எதிரியிடமிருந்து தப்பி விடுகிறது, மற்ற தாவரங்களை விட அதிகமான சக்தியை சூரியனிடமிருந்து கிரகிக்கும் திறன் கொண்டதால் பாசியினம் (algae) வேகமாக வளர்கிறது. ஒரு உயிரியின் வாழ்நாள் அதிகரிக்கும் போது தானாகவே அதன் இனமும் பெருகுகிறது.

“…as natural selection acts by competition for resources, it adapts the inhabitants of each country only in relation to the degree of perfection of their associates” (Charles Darwin, On the Origin of Species, 1859).

Natural selection-ஐ விளக்கமாகப் பார்க்க இங்கிலாந்தில் நடந்த ஒரு சம்பவத்தை பார்ப்போம்:

Peppered moths (Photo courtesy: © Wikimedia/ Olaf Leillinger)

கி.பி. 1800-களில், இங்கிலாந்து அதீதமான தொழில் வளர்ச்சி கண்டது. அப்போது தொழிற்சாலைகள் வெளியிட்ட மாசுபட்ட புகையினால் சுமார் 70 அந்துப்பூச்சி (moth) இனங்கள் பாதிக்கப்பட்டன, அதில் அதிகம் ஆராயப்பட்டது மரங்களில் காணப்படும் Peppered moth எனும் அந்துப்பூச்சி. இந்த பூச்சியினத்தில் பல வேறுபட்ட குழுக்கள் காணப்பட்டன. குறிப்பாக வெள்ளை மற்றும் கருப்பு நிற பூச்சிகள்.

Peppered moths on tree (Photo courtesy: © Wikimedia/ Martinowksy)

கி.பி. 1800-களுக்கு முன்னால் வெள்ளை நிறபூச்சிகளே அதிகமிருந்தது, சொற்பமாகவே கருப்பு நிறப் பூச்சிகளிருந்தன. தொழிற்சாலைகளின் கறுப்புப்புகையால் அநேகமான இடங்கள் கார்பன் படிந்து கறுப்புநிறமாக மாறின. மரங்களிலும் கறுப்புநிறம் படிந்தது. பறவைகளுக்கு உணவாகவும் இந்த பூச்சிகள் இருந்தது. மரங்களின் கறுப்பு நிறமாற்றத்தால் அதன்மேல் வாழ்ந்து வந்த வெள்ளை நிற பூச்சிகள் தனித்து தெரிந்தன. இதனால் பறவைகளால் இந்த வெள்ளைப் பூச்சிகளை எளிதில் கண்டுபிடித்து இரையாக்க முடிந்தது, கறுப்பு நிறப்பூச்சிகள் தப்பித்துக்கொண்டன. சில காலம் கடந்தபின் வெள்ளைநிறப் பூச்சிகளின் எண்ணிக்கைகள் பலமடங்கு குறைந்துவிட்டது. தன்னை உண்ணும் பறவைகளிடமிருந்து தப்பித்துக் கொண்டதால் கறுப்பு நிறப்பூச்சிகள் பலமடங்கு பெருகிவிட்டன. Natural selection-ஐ விளக்குவதற்கு இது ஒரு சிறந்த எடுத்துக்காட்டு.

Natural selection (modified from the original photo. Courtesy: © Univ.Calif.Berkely)

”I have called this principle, by which each slight variation, if useful, is preserved, by the term Natural Selection.” (Charles Darwin, On the Origin of Species, 1859).

இப்படிப் பல வகையில் எல்லா நேரங்களிலும் இயற்கை எப்போதும் தேர்வு செய்துகொண்டே இருக்கிறது. சூழ்நிலைக்கு தன்னை தப்பவைத்துக்கொள்ளும் குழுவோ/உயிரோ மட்டும்தான் நிலைத்துநிற்கும். ஒரு உயிரினத்தில் பல வேறுபாடுகள் கூடிய குழுக்களில் தப்பித்துக்கொள்ளும் குணத்தை ஒரு உயிரோ/குழுவோ தேர்ந்தெடுக்கமுடியாது முக்கியமாக அதை இயற்கைதான் தேர்வுசெய்யும் இதைத்தான் இயல் தெரிவு (Natural selection) என்கிறோம். பூமியில் உயிர் தோன்றிய காலம் முதலே நடந்துவந்த இயற்கையின் எல்லா தேர்விலும் தேர்ந்தெடுக்கப்பட்ட உயிரினங்கள் தான் இன்றுவரை வாழ்ந்து வருகின்றன. ஒரு செல் உயிரிலிருந்து இப்போது இருக்கும் உயிர் வரை ஏற்பட்ட மாற்றங்கள் தான் பரிணாமம்.

ஒரு உயிர் பரிணாமம் அடைந்துவிட்டது என்று எந்த உயிரையுமே சொல்ல முடியாது ஏனென்றால் பரிணாமம் என்பது எப்பொழுதும் நடந்துகொண்டேயிருக்கும் ஒரு செயல், இந்த நொடியும் இயற்கையின் தேர்வு நடந்துகொண்டேயிருக்கிறது. நாம் இப்போது மனிதனாயிருக்கிறோம் என்று வேண்டுமானால் சொல்லிக்கொள்ளலாம்.

Phylogenetic tree (Image courtesy © Open University; பெரிதாய் பார்க்க படத்தை க்ளிக் செய்யவும். மேலும் விளக்கமான படத்துக்கு இங்கு செல்லவும்)

ஆதிகாலத்திலிருந்த ஒற்றை செல் உயிர் எப்படியெல்லாம் பரிணமித்து புழு, பூச்சி, மனிதன் என பலகோடி உயிர்களாய் பரிணமித்திருப்பது மிகவும் ஆச்சர்யமான விஷயம். தனிச்சை மாற்றங்கள் (mutation) எப்போதும் தற்செயலாகவே (chance) நடக்கின்றன. ஆனால், அதனால் உடம்பில் ஏற்படும் மாற்றங்களில் எந்த மாற்றங்களை தக்கவைக்க வேண்டுமென்பது தான் Natural Selection (இயல் தெரிவு). தனிச்சை மாற்றங்களைப் போல் Natural Selection என்பது தற்செயலாக (chance) நடக்காது.

- (தொடரும்)

பரிணாமம்: Natural variation (இயல் வேறுபாடு)

2011-06-04T12:13:00.003+05:30

Natural Variation என்பது ஒரே உயிரினத்தில் காணப்படும் பல்வேறு மாற்றங்கள் மற்றும் வேறுபாடுகள். இவ்வகை மாற்றங்கள் இயற்கையாக அனைத்து உயிரினங்களிலும் காணப்படும். பெரும்பாலும் இந்த மாறுபாடு அவற்றை பாதிப்பதில்லை, உதாரணமாக மனிதர்களில்,

1. கண் நிறம் (கருப்பு, பழுப்பு, நீலம், பச்சை…).
2. ரோமத்தின் நிறம் (கறுப்பு, செந்நிறம், பழுப்பு…) போன்றவை. கீழுள்ள படத்தில், ஒரே வகை பூச்சியில் காணப்படும் வேறுபாடுகள்.

(Photo courtesy: © Univ.Calif.Berkeley)

இதுபோன்ற வேறுபாடுகள் உயிரினங்களின் ஜீனோம் (Genome)-களில் நடக்கும் தனிச்சை மாற்றங்களினால் ஏற்படுகிறது. ஜீனோம்களில் ஏற்படும் மாற்றங்கள்தான் நம் உடம்பு செல்களிலும், உடம்பிலும் மாற்றங்களை ஏற்படுத்துகின்றன.

ஒரு உயிரினத்தின் ஒட்டுமொத்த மரபுத் தகவல்கள் தான் Genome (ஜீனோம்) என்கிறோம். ஜீனோம்களின் இயக்கக்கூறு (functional unit) தான் Genes (ஜீன்கள்), (ஜீன்களற்ற இடங்களும் ஜீனோம்களில் உண்டு - intron). பெரும்பாலான உயிரினங்களின் ஜீனோம் டி.என்.ஏ (D.N.A)-வால் ஆனது. இந்த டி.என்.ஏ அமைப்பில் திடீரென்று தனிச்சையாக ஏற்படும் மாற்றங்களைத் தான் mutation (தனிச்சை மாற்றங்கள்) என்கிறோம்.

(Photo courtesy: The Diabetes Web)

இப்படிப்பட்ட தனிச்சை மாற்றங்கள் நம் உடம்பு செல்லில் அன்றாடம் நடந்துகொண்டேவும் இருக்கிறது. புறஊதா (Ultra violet) கதிர்கள், கதிர் வீச்சு (Radiation), மிகவும் ஆபத்தான வேதிப்பொருட்கள் போன்றவைகளாலும் ஏற்படுகின்றன. இவ்வகை தனிச்சை மாற்றங்கள் நம் உடம்பு செல்களிலோ (somatic mutations) அல்லது விந்து (Sperm), நாதத்திலோ (Egg) நடந்தால் அவை சந்ததிகளுக்கும் கடத்தப்படும். தனிச்சை மாற்றங்களால் நன்மையோ, தீய விளைவுகளோ அல்லது ஒன்றுமே நடக்காமலும் போகலாம்.

தனிச்சை மாற்றங்கள் உடம்பு செல்களில் நடந்தால் மாற்றம் ஒன்றும் நேராது அல்லது நோய்களை ஏற்படுத்தலாம். தனிச்சை மாற்றங்கள் விந்து-நாதத்தில் ஏற்பட்டால் அவை மேலே சொன்னது போல் ஒரு மாற்றத்தையும் ஏற்படுத்தாமலும் போகலாம் அல்லது சந்ததிகளுக்கு நோயை உண்டுபடுத்தலாம் அல்லது நன்மை செய்யலாம்.

(தொடரும்)

பரிணாமம்: டார்வின் மற்றும் வாலஸ்

2011-05-09T09:43:00.007+05:30

சார்லஸ் டார்வின் (Charles Darwin, 1809-1882), தனது 5 வருட கடற்பயணத்தில் தொகுத்த ஆதாரங்கள் அனைத்தையும் வைத்து ஆராய்ச்சி செய்துகொண்டிருந்தார். 1830-களின் கடைசியில் பரிணாமக் கோட்பாடு ஒன்றை உருவாக்கி அதை பல்வேறு காரணங்களால் வெளியிடாமலிருந்தார். கடவுள் மனிதனை நேரடியாகப்படைத்தார் என்று நம்பிக்கொண்டிருந்த காலமது அதனால் தன் கருத்தை நிரூபிக்க தகுந்த ஆதாரங்களை சேகரித்துக்கொண்டிருந்தார். அதற்காக சுமார் 20 வருடங்கள் ஆரய்ச்சி செய்தார். அதேகாலத்தில், ஆல்ஃப்ரெட் வாலஸ் (Alfred Wallace, 1823-1913) என்பவரும் தனியாக பரிணாமத்தைப் பற்றி ஆராய்ச்சி செய்து கொண்டிருந்தார்.

ஆல்ஃப்ரெட் வாலஸ் (Photo courtesy: © University College London)

சார்லஸ் டார்வின் (Photo courtesy: © Flickr.com/serkel)

இவர்கள் இருவருக்கும் பொருளியல் (Economics) மேதையான தாமஸ் மால்தஸ் (Thomas Malthus, 1766-1834) 1797-ல் வெளியிட்ட An Essay on the Principle of Population as it affects the Future Improvement of Society-ல் மக்கட்தொகை பெருக்கத்தையும் உணவு தட்டுப்பாட்டையும் இணைத்து தாமஸ் தெரிவித்த கருத்துதான் பரிணாமம் பற்றிய தங்கள் கருத்துக்கு தூண்டுதலாக அமைந்தது. இருவரும் (தனித்தனியே) ஒரு உயிர் பரிணமிப்பதற்கு இயற்கையை சார்ந்த காரணங்கள் இருப்பதாக நம்பினர். இந்த முறையை இயல் தெரிவு (Natural Selection) என்று டார்வின் அழைத்தார். டார்வினின் ஆராய்ச்சிக்கு வாலஸ் பறவைகளை கொடுத்து உதவினார்.

1858-ல் வாலஸ் தன் பரிணாமம் பற்றிய கோட்பாடை பிரசுரிப்பதற்கு முன் அதை டார்வினுக்கு அனுப்பி அவரின் கருத்துகளை கேட்டார். வாலஸின் ஆராய்ச்சி முடிவுகள் டார்வினுக்கு மிகுந்த அதிர்ச்சியையும் ஆச்சர்யத்தையும் தந்தது. ஏனென்றால் அது டார்வினின் கருத்துக்களை அப்படியே ஒத்திருந்தது. பிறகு, 1858-ல் டார்வின் மற்றும் வாலஸின் கருத்துக்களை லண்டனிலுள்ள லின்னியன் கழகத்தில் (உலகின் முக்கியமான இயற்கை வரலாறு பற்றிய ஆராய்ச்சிக் கழகத்தில்) ஒன்றாக வழங்கினர். அதற்குப்பின் டார்வின் அதை ஒரு புத்தகமாக வெளியிடுவதற்கான வேலையில் இறங்கினார், வாலஸ், தன் உயிர்புவியியல் குறித்த ஆய்வுக்கான பயணத்தை தொடர்ந்தார். 1859-ல் டார்வின் On the Origin of Species by Means of Natural Selection, or the Preservation of Favoured Races in the Struggle for Life என்ற புத்தகத்தை வெளியிட்டார்.

(Photo courtesy: © WikiMedia)

வழக்கம்போல இந்த புத்தகத்திலுள்ள கருத்துக்களை முதலில் விஞ்ஞானிகள் ஏற்க மறுத்தனர், பின்னர் பல விவாதங்களுக்குப் பிறகு உயிரினங்கள் பொதுவான மூதாதைகளிலிருந்து பரிணமித்தன என்பதை அநேகமான விஞ்ஞானிகள் ஏற்றுக்கொண்டனர். ஆனால், டார்வின் சொன்ன Natural Selection-ஐ பல காலம் வரை ஏற்க மறுத்தனர். 20-ம் நூற்றாண்டில், ஜீன்கள் மற்றும் தனிச்சை மாற்றங்களை (mutation) கண்டுபிடித்தபின் பரிணாமத்திற்கு Natural Selection தான் காரணமென்பது தவிர்க்க முடியாததாகிவிட்டது. இன்றுவரை இந்த புத்தகம்தான் அறிவியலில் அதிகம் படிக்கப்பட்ட, மிகுந்த செல்வாக்கான மற்றும் பிரபலமான புத்தகம். டார்வினுக்கு முன்னரே மனிதன் குரங்கிலிருந்து வந்தான் என்று பலர் சொல்லியுள்ளனர் (7-ம் நூற்றாண்டில் கிரேக்க தத்துவர்கள் Anaximander மற்றும் Empedocles போன்றோர்) ஆனால், டார்வினை பரிணாமத்திற்காக கொண்டாடுவதற்குக் காரணம் இவர் தான் அறிவியல் பூர்வமாக பரிணாமத்தை விளக்கி அதற்கு பல்வேறு ஆதாரங்கள் கொண்டு நிரூபித்தார். ஆனால், பரிணாமம் சார்பாக டார்வினுக்கு கிடைத்த அங்கிகாரம் வாலஸுக்கு இன்னும் கிடைக்காதது மிகவும் துரதிர்ஷ்டவசமானது.

Natural Selection (இயல் தெரிவு) & Natural variation (இயல் வேறுபாடு):
பல்வேறு உயிரினங்களை ஆராய்ந்த டார்வின், ஒவ்வொரு இனத்திலும் (Species) வேறுபாடு (variation) கொண்ட பல்வேறு குழுக்கள் இருக்கின்றன என்றும், இந்த குழுக்களுக்குள் உணவுக்கு, நீருக்கு, மற்றும் எதிரிகளிடமிருந்து காத்துக்கொள்ள பாதுகாப்பான இடம் போன்றவைகளுக்கு எப்போதுமே போட்டியிருந்துக் கொண்டேயிருக்கிறது என்றார். இது போன்ற உயிர்ப் போராட்டத்தில் பிழைத்துக் கொள்ளும் ‘தனிப்பட்ட குழுக்கள்’ தங்கள் ‘தனிப்பட்ட குணங்களை’ (heritable traits) தங்கள் சந்ததியினற்கு கடத்துகின்றன. அதனால், இந்தப் போராட்டத்தில் பிழைத்துக்கொள்ள முடியாத குழுக்களுக்கு இருப்பதைவிட பிழைத்துக் கொள்ளும் இந்த குழுக்களுக்கு அதிகமான சந்ததிகள் இருக்கும். நீண்ட காலத்துக்கப்பறம் பிழைத்துக் கொள்ளும் குழுக்கள் மட்டும் நிலைத்து நிற்கும் (Survive), மற்ற குழுக்கள் அழிந்துவிடுகின்றன (Extinct) என்றார். இப்படிப்பட்ட இயற்கையின் தேர்வுதான் Natural Selection.

குறிப்பு:
அநேகமானோர் நினைப்பது போல் ‘தக்கன பிழைக்கும்’ (survival of the fittest) என்று டார்வின் தன் புத்தகத்தில் எழுதவேயில்லை. அப்படி ஒர் வாக்கியத்தை டார்வினின் புத்தகத்தைப் படித்தபின் ஹேர்பர்ட் ஸ்பென்ஸர் (Herbert Spencer, 1820-1903) என்பவர் தான் அறிமுகப்படுத்தினார்.

-தொடரும்
-

பரிணாமம்

2011-04-24T08:08:00.002+05:30

உலகெங்கிலுமுள்ள அநேக உயிரியல் ஆராய்ச்சியாளர்களின் கனவு பரிணாம ஆராய்ச்சியைப் பற்றியதாகத்தான் இருக்கும். ஆனால், அறிவியலில் அதிகம் தவறாக புரிந்துக்கொள்ளப்பட்ட கருத்தும் பரிணாமம் தான். பரிணாமத்தை பற்றிய ஆராய்ச்சியை சார்லஸ் டார்வின் (Charles Darwin; 1809 –1882) ‘On the Origin of Species’ எனும் புத்தகமாக 1859-ல் வெளியிட்டார். பிறகு இந்த புத்தகம் தான் பரிணாமத்தைப் பற்றிய ஆராய்ச்சியின் மூலப்புத்தகமாகியது. டார்வினுக்கு முன் பல ஆய்வாளர்கள் தன் பரிணாமக் கோட்பாடுகளை முன் வைத்தனர்.

குறிப்பாக லமார்க் (Lamarck; 1744 - 1829) என்னும் பிரஞ்சு ஆய்வாளரின் கோட்பாடு (Lamarkism) மிகுந்த விமர்சனத்துக்கு உள்ளானது (பரிணாமத்தைப் பற்றி பகிரங்கமாக தன் கோட்பாடுகளை முதன் முதலில் வெளியிட்டதும் இவரே). அவர், ”ஒரு உயிரி தன் உறுப்பை (குணம்) தனக்கு சாதகமாக மாற்றிக் கொள்ளக்கூடும் அல்லது புதிய உறுப்பை (குணம்) பெற்றுக்கொள்ளக்கூடும் அல்லது தனக்குத் தேவையில்லாத ஒரு உறுப்பை (குணம்) இழக்கக்கூடும் - இந்த குணங்களை சந்ததிகளுக்கும் கடத்தக்கூடும் (inheritance) என்றும் அறிவித்தார் (inheritance of acquired characteristics as creatures adapted to their environments)”.

Lamarck in 1821. From © Desmond 1989

உதாரணமாக, ஒட்டகச்சிவிங்கி ஒரு காலத்தில் ஆடு போன்றதொரு விலங்காய் இருந்திருக்கலாம், அது மரங்களின் மேல் நுனியிலுள்ள இலைகளை உண்பதற்காக அதன் கழுத்து நீளமாக வளர்ந்திருக்கூடும் என்பதுதான் அது. அதாவது, ஒட்டகச்சிவிங்கி கழுத்து அதன் விருப்பத்தினால் பல தலைமுறைகளின் பின் நீளமாகியிருக்கலாம். ஆனால் இதற்கு fossil தடயங்கள் மற்றும் போதிய ஆதாரங்கள் ஏதுமில்லை.

மேலும் இவரின் கோட்பாட்டை சரி பார்க்க எலிகளின் வாலை 22 தலைமுறைகள் வெட்டிவிட்டனர், 22 தலைமுறைக்கப்பால் வால் வெட்டிவிடப்பட்ட எலிக்கு பிறந்த எலிக்கும் வாலிருந்தது - லமார்க்கின் கூற்றுப்படி பார்த்தால் பல தலைமுறைக்குப் பின்னால் பிறக்கும் எலிகளுக்கு வாலில்லமல் இருந்திருக்க வேண்டும். மேலும் இவரின் கோட்பாட்டில் பல சிக்கல்கள் இருந்தன. இவரின் கோட்பாடின்படி பார்த்தால் ஒரு பளு தூக்கும் விளையாட்டு வீரரின் பிள்ளைகளுக்கும் தசை வலிமையாய் இருக்கவேண்டும் - ஆனால் அது சாத்தியமில்லை. 19-ம் நூற்றாண்டின் ஆரம்பத்தில் லமார்கிஸம் மிகப் பிரபலமாக இருந்தது, பிறகு டார்வினின் இயற்கைத் தேர்வு கோட்பாடே (Theory of Natural selection) பெரிதும் ஏற்றுக்கொள்ளப்பட்டது.

மனிதன் குரங்கிலிருந்து வந்தான் என்னும் கருத்து அனைவரும் அறிந்ததே. குரங்கின் ஜீனோம்களில் ஏற்பட்ட தனிச்சை மாற்றங்களின் (mutations) ஒட்டு மொத்த கூட்டு பல தலைமுறைகளை கடந்தபின் குரங்கை மனிதனாக உருமாற வைத்தது. மிக முக்கியமாக இந்நிகழ்வு குரங்கின் விருப்பத்தினால் ஏற்படவில்லை என்பதே உண்மை.

- தொடரும்.

காற்றை வசப்படுத்தியவன்

2011-04-17T10:39:00.005+05:30

Image: © BBC

அக்கினிக் குஞ்சொன்று கண்டேன்
அதை ஆங்கொரு காட்டிலோர் பொந்திடை வைத்தேன்

வெந்து தணிந்தது காடு...

- 'மகாகவி' பாரதி

தென்கிழக்கு ஆப்ரிக்காவின் மலாவி (Malawi), 2001-ல் இதுவரை சந்தித்திராத கடும் பஞ்சத்தை எதிர்கொண்டது, ஆயிரக்கணக்கான மக்கள் இறந்துபோயினர். ஒருவேளை உணவு மட்டுமே சாப்பிட முடிந்ததால் வருடத்திற்கான பள்ளி செலவாக 3500 ரூபாய் கொடுக்கமுடியாமல் 14 வயது வில்லியம் காம்க்வாம்பா (William Kamkwamba, ஆகஸ்டு 5, 1987)-வை பெற்றோர்கள் பள்ளிக்கு அனுப்ப முடியவில்லை. மக்காச்சோளம் பயிரிட்டு அறுவடை செய்ய நெஞ்சில் உரமிருந்தாலும் கண்ணுக்கெட்டியவரை எங்கும் நீரில்லை.

வறண்ட பூமியை கண்டு சலித்தவருக்கு அதை தன் எதிர்காலமாய் நினைத்துக்கூட பார்க்கமுடியவில்லை. இந்த பயத்திலிருந்து தப்பித்து நூலகம் சென்று படிப்பது மட்டுமே ஆறுதலாயிருந்தது, மலாவியில் 2% மக்கள் மட்டுமே அனுபவிக்கும் மின்சாரம் மீதேற்பட்ட ஆர்வத்தால் மோட்டார்கள், மின்சாரம் மற்றும் மின்காந்தவியலில் தொலைந்துபோவது ஒரு போதையாயிருந்தது. இயற்பியல் பிடித்துப்போனது. ஆங்கிலம் அதிகம் பழகாத காரணத்தால் புத்தகங்களிலுள்ள படங்களை படித்துக்கொண்டிருந்தார். அப்போது காற்றாலை மின்சாரக் காத்தாடியை முதல் முறையாக Using Energy புத்தகத்தின் அட்டைப்படத்தில் பார்க்க நேர்ந்தது.

Image: © curiouslee

இதன் மூலம் மின்சாரம் எடுக்க முடியும்! மின்சாரம் எடுக்கமுடியுமானால் நீர்ப்பாசனமும் செய்யமுடியும். நீர்ப்பாசனம் செய்யமுடிந்தால் பஞ்சத்தை விரட்டமுடியும். எங்கோ எதற்கோ வழியிருப்பதாய் தோன்றியது. ஆறு மாதமாய் இதே கனவு அவர் தூக்கத்தை கலைத்தது. அருகிலிருந்த புகையிலை தொழிற்சாலையின் பழைய tractor விசிறியை கண்டெடுத்தார். அதனுடன், நண்பனிடமிருந்து வாங்கிய PVC பைப்பை உடைத்து, உருக்கி பட்டையாக்கி 4 பிளேடுகள் கொண்ட விசிறியாக விரிவுபடுத்தினார். மேலும் அங்கே கண்டெடுக்கப்பட்ட shock absorber-ஐ உடைத்து அதிலுள்ள piston-ஐ shaft-ஆக உபயோகித்துக்கொண்டார். Washer-களுக்காக அவர்கள் ஊர் மதுக்கடைகளின் அருகிலுள்ள beer bottle-லின் மூடிகள் பயன்பட்டன. தன் அப்பாவின் பழைய சைக்கிளில் அனைத்தையும் ஒன்றாகப் பொருத்தினார். பிறகு பல மாதங்களாய் தேடியலைந்து கிடைத்த 12-V சைக்கிள் டைனமோவை அந்த சைக்கிளின் பின் சக்கரத்தில் பொருத்தினார். இவையனைத்தையும் 16 அடி உயரமுள்ள மரக்கம்புகள் மேலேற்றினார். பின், பழைய ரேடியோக்களிலிருந்து பிய்தெடுக்கப்பட்ட செம்பு வயர்களை அந்த டைனமோவுடன் இணைத்து ஒரு சிறிய பல்பை எரிய வைத்தார்.

காற்றடிக்கும்போதெல்லாம் அந்த பல்ப் ஆரஞ்சு முதல் மஞ்சள் வரை எரிந்தது. ஆனால், காற்றில்லாத பொழுதுகள் இருளில் கழிந்தன. அதைப் போக்க ஒரு பழைய கார் பேட்டரியை உபயோகித்து டைனமோவிலிருந்து வந்த மின்சாரத்தை சேமித்து தன் வீட்டில் 4 பல்புகளை எரியவைத்தார். தேவையானபோது உபயோகித்துக்கொள்ள அதற்கான switch-ஐயும் உருவாக்கினார். முதலில் தன் நண்பர்களால் கேலி செய்யப்பட்டு பின் ஊரே அவரை கஞ்சா ஆசாமியாய்ப் பார்த்தது. மின்சார விளக்கால் அவர் வீடு பிரகாசித்தபோது சத்தமில்லாமல் அருகே வந்து மொபைல் charge செய்துகொண்டது அந்த ஊர். வறுமை மற்றும் இயலாமை பற்றி புலம்பாமல் தன்மீதிருந்த நம்பிக்கையாலும், விடாமுயற்சியாலும் மற்றும் அசாத்தியமான ஆர்வத்தாலும் தன்னையும் தன் குடும்பத்தையும் முன்னேற்றமுடியும் என்று நிரூபித்துக்காட்டினார்.

முதன் முதலில் 2006-ல் இதைப்பற்றியறிந்த அந்த ஊர் நாளேடுகள் செய்தி வெளியிட்டு இவரை அடையாளப்படுத்தின. அதன்பின் உலகமே இவரை கொண்டாட ஆரம்பித்தது. அமெரிக்காவின் முன்னனிப் பல்கலைகழகங்கள் /நிறுவனங்கள் இவருடைய பேச்சைகேட்க ஆவலாய் காத்திருக்கின்றன. தென்னாப்ரிக்காவிலுள்ள Johannesburg-ன் African Leadership Academy-ல் பள்ளி கல்வியை முடித்து ஆகஸ்டு 2010 முதல் அமெரிக்காவில் New Hampshire-லுள்ள Dartmouth College-ல் பொறியியல் படித்து வருகிறார். தொழில்நுட்பக் கல்வி முடித்தவுடன் காற்றாலை மூலம் மின்சாரம் தயாரிக்கவும், மின்சாரம் தயாரிக்கும் வேறுவழிகளை கண்டுபிடிக்கவும், அவற்றை மலாவியின் கிராமப்புரங்களில் பயன்படுத்தவும் திட்டமிட்டிருக்கிறார்.

ஒரு தனி மனிதனின் கனவும், சிந்தனையும் - ஒரு குடும்பத்தை, ஒரு கிராமத்தை, ஒரு நாட்டையுமே வழிநடத்திச் செல்லக்கூடுமென்று தன் இருப்பை வைத்து அறிவித்துக் கொண்டிருக்கிறார் வில்லியம்.

வில்லியம் காம்க்வாம்பா-வைப் பற்றிய குறும்படம் (Moving Windmills. © Directed by Tom Rielly and produced by Ben Nabors)

TED talk (July 2009, Oxford UK)

அவரைப்பற்றி:

A 2007 and 2009 TED Global Fellow.
Kamkwamba has been profiled in the Wall Street Journal.
His inventions displayed at Chicago's Museum of Science and Industry.
His memoir "The Boy Who Harnessed the Wind" has spent five weeks on New York Times bestseller list.
Amazon.com choose "The Boy Who Harnessed the Wind" as one of their top 10 books of 2009.

மேலும்:

கருடசேவை

2010-12-08T20:13:00.003+05:30

மூங்கில் காட்டில் தீ விழும்போது!

2010-12-08T08:47:00.003+05:30

திருவானைக்காவல்

2010-12-07T18:13:00.000+05:30

சுயம்

2010-06-19T16:38:00.007+05:30

கனவுகளின் கனத்த பிம்பங்களிலிருந்து
மீண்டு விழித்ததும்
அதீத கூக்குரலெடுத்து
கதறுகிறதென் சுயம்.
ஏதோவொரு
ரோமநிறம் மாறிய நாளில் தான்
அதுவென்னுள்
நுழைந்திருக்கவேண்டும்.
எனக்கு வெளியே
என் சுயமென்பது
வெறும்
பிம்பமாகிப்போனதில்
அத்தனை சௌகர்யம்.
எடுப்பான அடையாளங்களை
தேர்ந்தெடுத்து அடுக்கி,
யார்யாரையோ
பூசி மொழுகப்பட்ட
அச்சு அசலானவொரு
கூழ்மம் நான்.
யாருமற்ற
யதார்த்தத்திலிருந்து
விலகிய
கணங்களில் மட்டும்
ரணம் கமழும் அவஸ்தை.

Photo courtesy: © Alexandru Bizighescu.
-

எனக்கானவை

2010-02-17T12:17:00.011+05:30

நீங்கள் எரிக்கும்

என் பிணம் சிதறி வீழ்கையில்

வறண்டு, வாய் பிளந்ததும்

ஜீவாலையாக மாட்டேன்!

அகாலமாய் இறக்காமல்

உயிர் மட்டும் பறித்து

நெடு ஆழத்தில் புதைத்துவைப்பேன்.

என் உடல் தின்று செரித்து

காத்திருப்பேன்...

ரணங்கள் வலியெடுத்துக் கதறும்

குளிர்காலப் பகற்பொழுதொன்றில்

முனை மழுங்கிய என் விரல்களை

தேடிச்சென்று கூர் தீட்டி

தூரத்து கடல் நீரின்

ஈரம் உறிஞ்சி

செரித்த அணுக்களனைத்தும்

செலுத்தி

வேர் விட்டு,
வார்ப்பிரும்பு சங்கிலிகளுடைத்து

முளைத்தெழுவேன்!

துளிர்க்கும் அந்த நாள் முதல்

இது

எனக்கான மண்

எனக்கான வானம்

எனக்கான காடு...

Image courtesy: velhametsa.
-

நொடிக்கொரு துளி

2010-02-02T10:30:00.004+05:30

நாளைக்கான சமன்பாட்டில்
தவிர்க்கயியலாமல்
நேற்றைய என் சிதையும்
இன்றைய எச்சமும்
எப்படியும் ஒட்டிக்கொள்கின்றன...
கதறியழுத பின்னும்
மாறமுடியாத என்னை
தீயிலிடுவதாய் எழுதி
பேனா முனை நசுக்கியிருக்கிறேன்
ஏழாவது முறையாய்.

என் கதவுகளினுள் இன்றும்

பூட்டியே கிடக்கிறேன்,

என்றாவது விழித்துப்பார்க்கையில்
நானற்றதாகவே படுகிறது உலகம்.
முத்து, சிவக்குமார், சங்கர் வரிசையில்
நாளை நானுமிருக்கலாம்!
என்ன செய்ய
அனைத்தையும்
வேடிக்கை பார்த்திருப்பதைத் தவிர..?
நொடிக்கொரு துளியாய்
சிந்திக்கொண்டிருக்கிறது
வாழ்க்கை.

கூர்தலறம் - அகநாழிகை பதிப்பக வெளியீடு

2009-12-09T03:28:00.000+05:30

டிசம்பர் 30 முதல் ஜ‌ன‌வரி 10 வரை நடைபெற உள்ள 33வது சென்னை புத்தக கண்காட்சியை முன்னிட்டு 'அகநாழிகை' பதிப்பகத்தின் புதிய வெளியீடுகளில் என் கவிதைத் தொகுப்பும் வெளிவர உள்ளது, தலைப்பு 'கூர்தலறம்.' இந்த தொகுப்பு எனக்கு ஒரு சுவையான ஆச்சர்யம். இந்த தொகுப்பை வெளியிட உதவிய தோழி லாவண்யாவிற்கு என் நெஞ்சார்ந்த நன்றிகள். 'அக‌நாழிகை' பொன்.வாசுதேவ‌ன் அவர்களின் கவிதைகளின் வாசகன் நான், அவரின் 'அக‌நாழிகை' மூலம் இந்த தொகுப்பு பிரசுரமாவதில் எனக்கு அளவற்ற மகிழ்ச்சி, அவருக்கு என் நன்றிகள் கோடி. என் கவிதைகளை திருத்தி, செதுக்க உதவிய தோழி ஸ்ரீமதிக்கும், நண்பன் பிரதீப் குமாருக்கும், ஏனைய வலை நண்பர்களுக்கும் என் நெஞ்சார்ந்த நன்றிகள்.

அகநாழிகை பதிப்பக வெளியீடுகள்:

கவிதைகள்:

1. கருவேல நிழல் - பா.ராஜ‌ாராம் (விலை : ரூ.40/-)

2. கோவில் மிருகம் - என்.விநாயகமுருகன் (விலை : ரூ.40/-)

3. நீர்க்கோல வாழ்வை நச்சி - உயிரோடை லாவண்யா (விலை : ரூ.40/-)

4. கூர்தலறம் - TKB காந்தி (விலை : ரூ.40/-)

சிறுகதைகள்:

1. அய்யனார் கம்மா – நர்சிம் (விலை : ரூ.40/-)

கட்டுரைகள்:

1. பார்ப்பன சிபிஎம் + அமார்க்சியம்= ஈழவிடுதலை எதிர்ப்பு அரசியல் - தொகுப்பாசிரியர் : வளர்மதி
(கட்டுரையாளர்கள் : யமுனா ராஜேந்திரன், டி.அருள்எழிலன், வளர்மதி, ச.பாலமுருகன், இரா.முருகவேள்) (விலை : ரூ.90/-)

புத்தக வெளியீட்டு விழா:

நாள்: டிசம்பர் 11, 2009 வெள்ளிக்கிழமை மாலை 5.30 மணி

இட‌ம்: டிஸ்கவரி புக் பேலஸ்,
6, மகாவீர் வணிக வளாகம்,

முனுசாமி சாலை,

கே.கே.நகர் (மேற்கு) (பாண்டிச்சேரி ஹவுஸ் அருகில்),

சென்னை - 78

அகநாழிகையின் இம்முயற்சிக்கு உங்கள் அனைவரின் ஆதரவையும் எதிர்பார்க்கிறேம். அனைத்து புத்தகங்களும் வெளியீட்டு விழாவில் 10% தள்ளுபடியில் கிடைக்கும். மேற் குறிப்பிட்ட புத்தகங்கள் சென்னை புத்தகக் கண்காட்சியிலும் கிடைக்கும். நேரடியாக வாங்க விரும்புவோர் தொடர்பு கொள்ள வேண்டிய மின்னஞ்சல் aganazhigai@gmail.com.

அனைவரும் வருக !

புதியன புகுதலும்...

2009-11-16T00:39:00.002+05:30

குப்பையில் கிடத்திய
கிழித்த நாட்களின்
தவணை நினைவுகளை
அவள் நிரம்பிய சவப்பெட்டியில்
திணித்து
புதைக்கவைத்தது
நேற்று சந்தித்தவளின்
ஈஸ்ட்ரோஜன் வழியும் நளினம்.
ஒற்றைப் பார்வையில்
ஒளிபரப்பிக்கொண்ட
சம்மதங்கள் தாண்டி
பற்றியெறித்தது ஆதிக்கனல்.
சாம்பலாகையில்
எப்படியெனத் தெரியாமல்
நெருக்கமாகிவிட்டாள்
முன்னவளை விட
ஒரு சதமேனும்!

Photo courtesy: zycu.com

Waning gibbous

2009-11-05T16:59:00.004+05:30

Waning gibbous, originally uploaded by Gandhi Theerthagiri.

Canon 400D, 55-250mm@250, 1/10s, f/20, ISO100
On black

-

முன்பனி இலைகள்

2009-10-25T15:49:00.006+05:30

Uploaded by Gandhi Theerthagiri through Flickr.
Canon 400D, 18-55mm@49, 1/60s, f/5.6, ISO200
View larger on white background.

சொல்ல மறந்தவை

2009-09-08T20:02:00.003+05:30

நீ வீசியெறிந்த மெளனத்தில்
அலை தளும்பி நிற்க்கிறதென் குளம்
கரையொதுங்கும் சில குமிழிகளுக்கு மட்டும்
சொல்லிவைப்பேன்
உன்னிடம் சொல்ல மறந்தவைகளை.
ஆகாயம் வீசும்
பேய்க்காற்றில்
அவை உடைவதற்க்குள்
ஒரே ஒரு முறையேனும்
என் குளத்தில்
கால் நனைத்து செல்.

Photo courtesy: free-background-wallpaper.com
-

தியாகத்தின் அறிவியல்

2009-09-06T06:06:00.018+05:30

சார்ல்ஸ் டார்வின் (1809-1882) தன் The Origin of Species-ல் 'தக்கன பிழைக்கும்' அதாவது உயிரினங்கள் வாழ்வதற்கு ஒன்றோடொன்று போட்டி போட்டுக் கொள்கின்றன, அதில் தகுதியானவையே வாழும் என அறிவித்தார். இந்த கட்டுரை அதைப்பற்றியல்ல. அவர் விவரிக்கத் தடுமாறிய தியாகத்தை (sacrifice)-ப் பற்றியது. அதாவது, தக்கன பிழைக்குமென்றால் ஒரு உயிர் மற்றோன்றிற்க்கு ஏன் உதவவேண்டும்?, ஒத்துழைக்கவேண்டும்? அல்லது தியாகம் செய்ய வேண்டும்? டார்வினால் விவரிக்க மிகவும் தடிமாறிய விசயம்தான் இந்த ’தியாகம்.’

வேலைகாரத் தேனி அதன் கூட்டத்தின் நன்மைக்காக கடினமாக உழைக்கக்கூடியது ஆனால் அதனால் இனப்பெருக்கம் செய்ய முடியாது, பிறகேன் யாருக்காகவோ இப்படி உழைக்க வேண்டும்? இவ்வகை உயிரிகளை (social organisms) தன்னால் புரிந்துகொள்ள முடியவில்லையெனவும் தன் கோட்பாட்டால் இவைகளை விவரிக்க முடியாதெனவும் டார்வின் தன் The Origin of Species-ல் சொல்லியிருக்கிறார். இப்படிப்பட்ட தியாகங்களால் தான் பரிணாமத்தில் பல முக்கிய மாற்றங்கள் ஏற்ப்பட்டிருக்கின்றது. அந்த தேனியைப் போலவே, ஒரு வகை வேலைகார எறும்பாலும் இனப்பெருக்கமுடியாது ஆனால் அது அதன் ராணியின் குழந்தைகளை பேணி வளர்க்கும். இந்த மூன்று பில்லியன் வருடங்களில் ஒரு செல் உயிரியிலிருந்து ஆறு அறிவு மனிதனாக மாற இயற்கைத் தேர்வும் (Natural selection), மரபணுப்பிறழ்வும் (Mutation) மட்டுமே காரணமாக இருக்க முடியாதெனவும் இதுபோன்ற தியாகங்களும் மிக முக்கியமென சொல்கிறார் மார்டின் நெளக் (Harvard University, USA). நீங்கள் Discovery, NGC, AP-ல் பார்க்கும் உயிரைப் பணையம் வைத்து தன் குட்டியைக் காப்பாற்றும் மானும், சின்னம்மையில் நீங்கள் படுத்தால் மாரியம்மனுக்கு விரதமிருக்கும் உங்கள் அம்மாவும் தியாக உருவாக மாறி உங்களை காப்பாற்ற முயலும் குடும்ப பந்தங்களாலும், பிறர்க்காக விட்டுக்கொடுத்து வாழ்வதன் மூலமாகவும் ஒரு இனத்தின் வளர்ச்சி ஓங்கும்மென்றும் இது போன்ற குடும்பங்களை Natural selection விரும்புமென்றும் டார்வின் சொல்லியிருக்கிறார்.

டார்வின் கொடுத்த இந்த துப்பை வைத்துக்கொண்டு வில்லியம் ஹேமில்டன் (1936-2000) என்னும் இங்கிலாந்தைச் சார்ந்த பரிணாம ஆராய்ச்சியாளர் ’தியாக’ங்களை Inclusive fitness எனும் சமன்பாட்டில் கொண்டுவந்து டார்வினின் எதிர்கொண்ட பிரச்சினைக்கு விடை கொடுத்தார். அதாவது, உங்கள் உறவுக்காரர்கள் உங்களையொத்த குணமுள்ளவர்கள் (எதோ ஒரு வகையிலாவது – நல்லதோ/கெட்டதோ) அந்த குணமே உங்கள் குடும்பத்தில் மேலோங்கியிருக்கும். அதனால் ஒரு குடும்பத்தில் ’தியாகி’கள் சில இருந்து தானழிந்து தன் குடும்பத்தை வாழையடி வாழையாக பெருகுவர். குடும்ப உறுப்பினர்கள் பெருகுவார்கள், அந்த குடும்பம் பெருகுகிறது. இந்த குடும்பம்போல் தான் ஒவ்வொரு உயிரிக்கும். எடுத்துக்காட்டிற்க்கு, ஒரு வகையான அணில் தன்னை இரையாக்கவரும் விலங்கைப் பார்த்ததும் கத்தி தன் சக அணில்களைக் எச்சரிக்கும், அதன் சப்தத்தில் அந்த விலங்கிடம் தான் சிக்கிக்கொள்ளும் – இந்த ’தியாக’ அணில் இரையாகக்கூடும் ஆனால் மற்ற அணில்கள் காப்பாற்றப்படும், இப்படி சில தியாகிகள் இறந்தாலும் அந்த குழுமத்திற்க்கு கடைசியில் நன்மையே. மாறாக, அந்த அணில் தான் மட்டும் தப்பி இருந்தால் அந்த குழு சில அணில்களை இழந்திருக்கும். இப்படி அந்த குழு எண்ணிக்கை குறைந்துகொண்டே போயிருக்கும். ஒரு உயிரின்/குழுவின்/குடும்பத்தின் பரிணாம வெற்றி அதன் நகல்களின் எண்ணிக்கையில்தான் உள்ளது அதனால் உதவி/தியாகத்தினால் ஒரு உயிரின்/குழுவின்/குடும்பத்திற்கோ எந்த கெடுதலும் எற்படாது மாறாக நன்மையே ஏற்படும்.

மேலே குறிப்பிட்ட அனைத்தும் ஒரு குழுவிற்கோ, இனத்திற்கோ, உயிரிற்கோ பொது. இப்படியான sacrifice, cooperation, altruism போன்ற குணங்கள் பரிணாம வளர்ச்சியில் ஒரு உயிரி தன் பரிணாம வெற்றிக்காக அந்தந்த உயிரினங்களில் இயற்க்கை ஏற்ப்படுத்தியுள்ளது என்பதைத் தாண்டி நம்மால் அவற்றை இன்னும் புரிந்து கொள்ள முடியவில்லை.

டிஸ்கி:
நீ கவிதையெழுதினா யாருக்கும் ஒரு பைசா பிரயோஜனமில்ல, உருப்படியா எதுனா எழுதுனா தேவலாமென்று சொன்ன நண்பர்களுக்காக. இது உபயோகமானதான்னு தெரியல, ஆனா இந்த வருடம் டார்வினின் 200-வது பிறந்த வருடம் மற்றும் அவர் எழுதிய The Origin of Species-ன் 150-வது ஆண்டு விழாங்கறதுனால இது.

References:
1. Darwin, C. R. 1859. On the origin of species by means of natural selection, or the preservation of favoured races in the struggle for life. London.
2. Science (2009) Vol. 325. no. 5945, pp. 1196 – 1199.
3. Dawkins, R. 1976. The Selfish Gene. Oxford. London
4. http://en.wikipedia.org/wiki/Inclusive_fitness

Photo courtesy: sciencemag.org

-

சிலுவை

2009-09-02T14:28:00.002+05:30

என் போலவே
சிதறியிருந்த கூட்டத்தில்
அவள்மட்டும்
எனை
உருக்கிடும் ரசாயனங்களை
செய்து கொண்டிருந்தாள்.
கரைந்துகொண்டிருந்தேன்.
கடற்கரையில்
நாற்பது டிகிரி வடக்கில்
தனியாய்
அமர்ந்த அவளுக்கு
கண்மூடி ஜீவரகசிய
முத்தமிட்டேன்.
இதழ் பிரிக்கையில்
நூல் அறுந்து
ஒட்டிகொண்ட
எச்சில் குமிழிகளில்
தொடங்கி
கொட்டிய நீரைப்போல்
படர்ந்து
நிரம்பிவழிந்து கொண்டிருந்தாள்.
சிவந்த கண்களுடன்
மொழியின் வசமற்று
வாய் பிளந்து...
கண் திறக்கும்
பொழுதிற்க்குள்
என் காலடியில்
எனக்கான சிலுவை
முளைத்துக்கொண்டிருந்தது...

Photo courtesy: tbclink.org

கலவை

2009-08-31T14:05:00.002+05:30

இத்தனை நாட்களில்
எதுவாகவும்
ஆகமுடியவில்லை
நல்லவனாகவோ,
கெட்டவனாகவோ.
முழுதும்
உண்மையானவனாகவோ,
ஏமாற்றுபவனாகவோ.
எல்லோரிடமும்
காண்பிக்கவும்
ஒளித்து வைக்கவும்
அவரவர்களுக்கான
சிற்சிலவற்றை வைத்துள்ளேன்.
தனிமையில்
எதாவது ஒரு நேரத்தில்
இப்படி கலவையாகவோ
அல்லது
கலவையின் கலவையாகவோ
உணரும்போது
என் கண்ணாடி பிம்பங்களில்
அழுக்கின் கனம் மட்டும் கூடியிருக்கிறது.
இப்போது,
இந்த மூலையில்
வன்மையான கசப்புடன்
என்னை தேற்றிக்கொள்ள வைப்பவை
அவரவர்க்கான
அழுக்கு தோய்ந்த
அவரவர் பிம்பங்கள் மட்டுமே.

Fyodor Dostoyevsky (1821-1881)க்கு...

Picture courtesy: chuckypita.com
-

நாவினாற் சுட்ட வடு

2009-08-26T14:33:00.008+05:30

அவரவர் உமிழ்ந்த
சொற்களிலிருந்து
முளைத்துவிடுகிறது
அவரவர் செடிகள்.

அவரவர் சொற்கள்
அவரவர் செடிகள்
அதனதன் வீரியங்கள்
அதனதன் விருட்சம்.
நீரூற்றி வளர்ப்பது மட்டும்
என் பாடு.
நோய் பட்டும்
பூச்சி தின்றும் இறந்துவிட்டன
சில செடிகள்.
வளர்ந்த மற்றவை
பூக்கத்தொடங்கி
ஒரு ஏப்ரல் மாதத்தில்
கனியத்தொடங்கின
அவரவர் பூக்கள்.
அதனதன் கனிகள்
அதனதன் சுவை
அதனதன் குணம்.
அவரவர்க்கு
அவரவர் பழங்களை
பறித்துக் கொடுப்பது மட்டும்
என் பாடு.

Photo courtesy Imapix.

நகரமுனி

2009-08-24T20:14:00.003+05:30

சலித்த விட்டுக்கொடுத்தல்கள்,
புறக்கணிப்பு காயங்கள்,
கொல்லப்பட்ட காதல்,
மறுக்கப்பட்ட அன்பு,
நம்பிக்கையிழப்புகள்,
அவமானங்கள்,
அறுந்த உறவுகளென
தேர்ந்தெடுத்த கூரிய காயங்களை
எதிர்படும் காலங்களில்
தடயங்களின்றி அழிக்கப்படவேண்டி
நாட்குறிப்பின் கிழிந்த இடங்களில்
தோண்டியிருக்கிறேன்
அதனதன் சவக்குழிகளை
அந்த அடர் இருட்டு பக்கங்களில்,
அவர்களுக்கான
அன்பு பூசிய
சொற்களுக்கு
அன்றன்று பூத்த
பாரிஜாத பூக்களையும்
சொருகியிருக்கிறேன்.
கனத்த பெருமழை வெறும்
பேரிரைச்சலுடன் பேய் மழையாகும்
செய்ய ஏதுமற்ற
நரைத்த நேரத்தில்
காய்ந்த பாரிஜாத பூக்கள் தோய்ந்த
கிழித்தபோது ஒட்டிக்கொண்ட
ஒவ்வொரு பக்கங்களிலும்
படுத்துறங்கி
அவ் ஒவ்வொருவர் மீதும்
தனித்தனியாய்
பற்றில்லாமல்
காதலில்லாமல்
காழ்ப்பில்லாமல்
துக்கமில்லாமல்
வன்மமில்லாமல்
சிரிப்பில்லாமல்
விடியும் என் பொழுதுகள்.

Photo by Grafter.
-

ஆதாம் பறித்த ஆப்பிள்

2009-08-20T02:59:00.006+05:30

விழித்ததும்

பிரிந்ததுணரும் முன்னர்

உனை அழைக்க அழுத்தப்பட்டது தொடங்கி

முதல் ரிங்கிற்க்கு முந்தைய

மில்லி நொடியில்

எனை கவ்வ

காத்திருக்கிறது

ஒரு விலங்கு.

பேசும் முன் துண்டிக்கவைத்து

நிரம்பிவழியவிடும்

என் வெற்றிடங்களை.

விடுபடலோ

விடுதலையோ

சாத்தியமில்லை

அதனிடம்.

தெரிந்தே உன் எண்ணை

அழுத்தியவொரு

மதிய வேளையில்

பழகிய தாமதத்துடன் வந்து

உயிர் கத்தியழுது கதறியும்

என் தலை கவ்வி

துளித்துளியாய்

ரத்தம் சொட்ட

எல்லோருக்கும் பரிமாறும்

எல்லோரும் விரும்பியபடியே

நானில்லாத

அவர்களுக்கான என்னை.

Cheers

2009-08-12T23:12:00.010+05:30

Click on the photo for better resolution

Canon D400, EFS18-55mm@30, 1/500s, f5.6, ISO100.

-

Achilles’ heel

2009-08-11T21:55:00.000+05:30

நீயற்ற வாழ்வின் சமன்பாடுகளின்
விடைகளுக்காக
நெடுநாள் காத்திராமல்
இறந்துவிட்ட அன்பின்
இறுதிச்சடங்கில்
துக்கமோ
விரக்தியோ
அல்லது
எதுவெனத்தெரியாதவொன்றால்
விம்மி பின்
உடைந்து அழுது
புதைத்து திரும்பும் வழியில்
உனை
தொலைக்கவும்,
சுமக்கவுமியலாமல்
கூனல் விழுந்து
உன் கைக்குள்
சுருங்கிக்கொள்கிறேன்.
உனையும் புதைத்துவிட்டு வருவதாய்
சொல்லிவந்த
என் வீட்டு
கண்ணாடியிடம்
என்ன சொல்ல?

முடிவற்றவை

2009-08-10T05:37:00.000+05:30

சிக்குண்டு கிடக்குமொரு
வெண்மதியப் பொழுதில்
மூடிய ஜன்னலிடுக்கில்
பீறிட்டெழும் ஒளிக்கீற்றில்
மிதந்து செல்லும்
தூசியின் நோக்கமுடையது
என் மனமெனும் பிராணி.
வெளியேற வழியற்ற
ஒளிதாண்டிய
ஓரிடத்தில்
இந்த கவிதையை போலவே
முடிவற்றிருக்கும்...

தேவகணம்

2009-08-07T20:13:00.005+05:30

உனை பிரியும் நேற்றே
துவங்கிவிட்ட
இன்றய அஸ்தமனத்தில்
ஒருசில கண்ணீரே
வைத்துள்ளேன்.
எனக்காகயிருக்கட்டுமவை!

நுகர்ந்ததும்
உணவில்லை
என்றுணர்ந்த எதோவொரு
ஐந்தறிவு போல்
அலைக்கழிக்கப்படுகிறது
என் வாழ்வு.
நுகர்ந்த மூச்சில்
ஆடிக்கொண்டிருக்கிறாய் நீ.
யௌவன பொழுது
நிறைந்த கோப்பைக்குள்
வழிந்து நிறைகிற
உன் நினைவுகள்
தொலைந்த தேவகணத்தில்
என்னுள்
நுழைந்துகொள்ளும்
அருகிலிருந்து எனைப்
பார்த்துக்கொண்டிருக்கும்
நான்.

காற்றில்லா நாள்

2009-08-02T23:34:00.004+05:30

நாட்களின் வசீகரங்கள் தொலைந்த
கடும்நெடி வீசும்
ஒரு பழுப்புநிற மாலையில்
சிமென்ட் பெஞ்சில்
சந்திக்கநேர்ந்தது
விழிமணியில் ரத்தம் தோய்ந்த
என்றோ சந்தித்த அவளை.

சில சில்லுகளே மீதமிருந்த
அவள் இதயத்தை ஒட்டவைக்க
பிரியங்கள் பூசிய
என் மென்சொற்களுக்காக
இளஞ்சூட்டு கண்ணீரை
என் தோளில் கொட்டினாள்.
கொஞ்சம் விசும்பல்கள் தாண்டி
காற்றற்ற மரமாய்
அமைதியாயிருந்தவள்
மெல்லிய புன்னகையோடு
தேங்க்ஸ் சொல்லி மறைந்தாள்.

உறங்கையில்
அத்தனை கடுமையில்லாத
வெறும் காற்றில்லா நாளாகிப்போனது
அன்றைய தினம்.

ஏழு கால் சிலந்தி

2009-07-29T03:31:00.006+05:30

பெண்மையின் மென் ஸ்பரிசங்களின் மீது
என்றோ விழுந்த நீள் உறக்கத்தில்
திருடுபோகிறேன்.
புயல் கடந்த இடமாகிப்போனவொரு இடத்தில்
உடைத்தெறிய முடியாத பொழுதில்
அவளுள் நுழைந்து தாழிடும்
இரக்கமற்ற மௌனங்களில்
வாழ்தலின் கனம்
பிடுங்கித்தின்னும
என் ஒற்றைக்கண் பூனை
வெறுமை மிகு பாதாளங்களில்
ரத்தம் வழிய இறந்துகிடக்கிறது.

மேகமூட்ட வானின் விளிம்பு தாண்டிய நீர்
உச்சந்தலை நனைக்கையில்
உலகின் சூட்சுமங்களில் ஒன்றை அறிகிறேன்.
திரும்பத் தீண்டக்கூடும் ஸ்பரிசத்தை
காதலிக்கக்கூடும்.
அதுவரை,
களவு போனவைகள்
தொலைந்தவைகளாகக்கூடும்
இதயமும் சேர்த்து...

போதி மரம்

2009-05-21T12:21:00.006+05:30

பாசி பருகிக்கொண்டிருக்கும்
குளமொன்றின் முனகல்
கேட்டவொரு
ஞாயிறு பிற்பகல் கனவில்
புத்தர் தோன்றினார்.
அவர் கண்ட
நான்கு உண்மைகளை
தேஜஸ் வழிய
பிரசங்கம் செய்துகொண்டிருந்தார்,
லேசாகிக்கொண்டிருந்தது மனது...
அவர் போதிமரத்தடியில் இல்லை
எங்கு தேடியும்
போதி மரத்தை காணவேயில்லை,
அது புத்தராய் இருக்காதேன்று
எழுந்து
சோம்பல் முறித்துக்கொண்டேன்.

-

போராளியின் குறிப்பு

2009-04-29T02:12:00.010+05:30

துர்நாறும் இந்த பொழுதில்
குறித்துக்கொள்கிறேன்
நீங்கள் எங்களுக்கு செய்தவற்றை
அதில் எழுதாத மைதீட்டிய பக்கங்களும்
குறிப்புகளே.

வலிமை மட்டுமே பிரதானமான பின்
நீங்கள் இளைப்பாறும் கணத்தில்
எங்கள் பிள்ளைகளுக்கு
இந்த குறிப்புகளோடு கற்பிப்போம்
கொலை, வன்புணர்ச்சி
இன்னபிற வலியனவைகள்.

ஒரு மயிர்கூச்செறியும் கணத்தில்
பெருகும் எங்கள் வெளிச்சம்
வழிகாட்டுதலின்பாற்பட்டதல்ல.
அப்போது
வெற்றிக்கான எங்கள் குறியீடாய்
நீங்கள் எங்களுக்குச் செய்தவைகளோ
அல்லது
ரணப்பொழுதில் நாங்கள் யோசித்தவைகளோ...

அதுவரை
சமாதானமென்பது
அகராதியில்
'ச' வரிசையில் வருமொரு
சொல் மட்டுமே.

இடுக்கண் கலைவதாம்...

2009-04-28T02:19:00.011+05:30

எல்லாவற்றின் நடுவிலும்
அவனுக்கேற்பட்ட
விபத்தே அரைநாளாய்
கவனம் கலைத்தது.
அவசரமாய் கிளம்பி
பார்த்துவிட்டு வருகிறேன்.
வெள்ளை பேண்டேஜுடன் தடித்திருந்தது
அவன் வலக்கை,
நெற்றியில் நான்கு தையல்.
ஒன்றும் பெரியதாய் ஆகிவிடவில்லை!
கொஞ்சம் நிம்மதி.
உடம்பை பார்த்துக்கொள்ளுமாறு
வருந்திவிட்டு
ஒரு வாய் காப்பி குடித்து
டிஞ்சர் வாசத்துடன் வந்துவிட்டேன்.

இப்போதெல்லாம்
அடிக்கடி கனவு காட்டிக்கொண்டிருக்கிறது
அவனையும்,
கைமாத்தாய் வாங்கிய
முன்னுற்றி சொச்சம் ரூபாயையும்,
அவன் சொல்லவேண்டிய
ஒரு
தேங்க்ஸையும்.

-

என்.ஆர்.ஐ பொழுதுகள்

2009-04-18T22:13:00.016+05:30

சுப்ரபாத விழிப்பு
வளையமுடிந்த யோகா
ஃபில்டர் காபியுடன்
ஓரம் மடங்காத தினமணி
ஹமாம் சோப்புக்குளியல்
அரைமணி தியானம்
இட்லியுடன் தேங்காய் சட்னி
அலுவலக அவசரத்தில் அவள் முத்தம்
சிக்னல் விழாத சாலைகள்
சிதறவிரும்பாத வேலை
மாவடு ஊறிய தயிர்சாதம்
தாஜ்மஹால் டீயுடன்
புகைபிடிக்காத நண்பர்கள்
ஆறுமணி வீடு திரும்பல்
டீவி இல்லாத மாலை
ரசிக்கவொரு கவிதைப்புத்தகம்
என்னுடன் ரசிக்கும் அவள்
இருவரும் சமைத்த
எண்ணையில்லாத உணவு
லேசாய் குளிரும் மொட்டைமாடியிரவு
அவளின் முப்பத்தியேழு டிகிரி வெப்பம்
பேச சிலவிஷயங்கள்
சூடான பசும்பால்
சலிக்காத சிருங்காரம்
மார்மேல் அவள்கை
கனவில்லாத உறக்கம்.

மாறிக்கொண்டிருக்கும்
என் நிலங்களில்
டெட்லைன் வேலையின்பின்
பாஸ்தாவுடன் கொஞ்சம்
மெர்லாட் ஒயின் குடித்துத் திரும்பும் வழியில்
ஸ்டார் பக்ஸ் எஸ்ப்ரசோவிற்கப்பறம்
காலையில் க்ளையண்ட் மீட்டிங்கையும் சேர்த்து
இவையோசித்து
விழித்து கிடக்கிறேன்.

உயிரோசையில் பிரசுரமான கவிதை.

ஓசையடங்கிய மனம்

2009-03-11T03:27:00.014+05:30

ஒரு நேர்கோட்டிலோ

எந்தவொரு புள்ளியிலுமோ
கிட்டத்தட்ட
வசப்படாத சூரியனின் முதல் கீற்றைப்போல
வட்டத்தின் அத்தனை மூலைகளிலும்
ஒருநொடிக்குள் தெறித்தோடி
மலையுச்சியில் குளிர் கூசி நிற்கும்
கோணிய என் மனதிற்கு
இப்போதைய
புருவமத்தியிலோ
பினியல் சுரப்பியிலோ
என்றோவொரு வயோதிக
மழைகாலங்களிளோ
பறைகிழித்துக்கேட்கும் அழுகுரலிலோ
அதைத்தாண்டி தூவப்படும்
ரோஜாவோ
செண்டுமல்லி வாசனையிலோ
அல்லது
தீயின் பிரதேசத்திலோ
எப்படியோ
என்றாவது சாத்தியப்படட்டும்
மூன்றாம் தந்திரத்தில்
திருமூலனருளிய
ஓசையடங்கிய மனம்.

நீயெனும் மௌனம்

2009-03-08T18:26:00.014+05:30

விட்டுச்சென்ற
மௌனங்களில்
சகிக்கமுடியாத
நீயாகிறாய்
நீ

கனத்த உன் மெளனங்களை
சுமந்து செல்கையில்
நீயில்லாத வலியும் சேர்த்து
வலிகள் எல்லை கடந்தவொரு பொழுதில்
தவறி
என் வீடுமுன் தேங்கி நிற்கும்
மழை நிரப்பிய
பழுப்புநீரில்

வீழ்கையில்

சிறுவயதுமுதல்
கனவில் வரைந்து

முடிக்கயியலாத
பறவையொன்று
உயிர்த்தெழுந்து
என்னயும் கவ்விச்சென்றது.
எதோவொரு

இதய அறையில்
என் தெய்வங்களிடம்
உனை மறக்காமலிருக்க வேண்டியது மட்டும்
அறும் கடைசி நூலாய்
உறுத்திக்கொண்டேயிருக்கிறது.

சொற்கொலை

2009-02-24T13:16:00.006+05:30

நம் பிரிவின்முன் ரயிலேறியபோது

நீ சொன்ன சொற்கள்

என் எல்லா ரயிலுக்கான காத்திருப்பிலும்

பிளாட்பாரமெங்கும் சிதறிக்கிடக்கும்.

ரணம்கூட்டும் சொற்கள்மட்டும் பொறுக்கியெடுத்து

தண்டவாளத்தில் கொலைசெய்யவைப்பேன்.

ரயிலேற்றி கொலைசெய்யப்பட்டபின்னும்

பயணம்முழுவதும் இம்சித்துக்கொண்டிருக்கும்

மரண ஓலமாய்

உன் நினைவுகளோடு...

ஒரு வேளை

2009-02-15T03:03:00.012+05:30

நமக்கான பாலடயாளங்கள்
மறைத்தொழித்து
உன்னுடன் ஒத்ததிர்ந்து துடிக்கிற
இதயமாகவேயிருக்க
இன்றும்விரும்புகிறேன்.

எப்போதாவது
நீ துடித்தெழுந்துணரும்
நொடிப்பொழுதில்
உன் எல்லைதாண்டி
எவ்வளவுதூரம்
சென்றிருப்பேனென்று
நிச்சயமாய்த் தெரியவில்லை...
கூப்பிடும் தூரத்தில் தென்பட்டால்
கூப்பிட்டுப்பார்
ஒரு வேளை
நான் திரும்பலாம்.

மெல்லக்கொல்லும்விஷம்

2009-02-07T23:15:00.005+05:30

என் மனைவிக்கான
கண்மூடிய
அந்தரங்க நேரங்களில்
அபத்தமாய்
நுழைந்துவிடுகிறது
ஒரு நொடிக்குமுன் கூட
ஞாபகமில்லாத
உனைப்பற்றியவைகள்

எதற்காகவோ...
எதையும் யூகிக்கத் தோன்றவில்லை.
நீ எனை விட
மகிழ்ச்சியாயிருப்பதாய் நினைத்துக்கொண்டு
முத்தமிடுகிறேன்
நொடிதோறும் என்னையே
நினைத்துக்கிடக்கும்
மனைவியை.

பின்னொருநாள்
உனை மறந்தது நினைவிலில்லாமல்
காலண்டரின் மார்கழித்தேதிகளிலோ,
கோவிலின் லௌட் ஸ்பீக்கர்
பக்திப் பாடல்களிலோ
அல்லது
என் மனைவியின்
விடியற்காலை பூசணிப்பூ
கோலத்திலோ தெரிந்துவிடும்
உன் பிறந்தநாள்.

நிர்ணயம் செய்யப்பட்ட
வருடத்தின் பண்டிகைகள்
போலவே சீரானவொரு
இடைவெளியில்
வந்துபோய்க்கொண்டேயிருக்கிறாய்.
பிரியும்போது
உனை மறக்கத்தேய்க்கும்
களிம்போ, மாத்திரையோ
கேட்டு வாங்கியிருக்கலாம்
உன்னிடம்.
---

வெண் விதவை

2009-01-21T02:55:00.011+05:30

புத்தாண்டை நெருங்கிய அன்றையதினம் ஒரு சராசரி தினத்திலிருந்து சற்று விலகி ஏதோ எதிர்ப்பார்ப்புடனேயே இருந்தது. வெயில், முந்தைய நாளின் வாசலிலே நின்றுகொண்டிருந்து காலை எட்டு மணி வரை. ஆம்ஸ்டர்டாமில் அந்த பிரபலமான Grasshopper coffee shop-ல் புகைகளுக்கு நடுவே நுழைந்து reception-ல் நின்றுகொண்டிருந்தவளிடம் நண்பன் ஏதோ கேட்க அவள் white widowவென்று ஒரு பாலிதீன் கவரை அவனிடம் கொடுத்தாள்.

முதல்முறை என்பதாலும் அநேகயிடத்தில் தடைசெய்யப்பட்டதாலும் பற்றவைத்ததும் முதல் இழு கொஞ்சம் சுவாரஸ்யமாயிருந்தது. பிறகு, இரண்டாவது, மூன்றாவது, நான்காவது, ஐந்தாவது............... லேசாய் காது அடைபட்டுக்கொண்டே இருந்தது. அணைக்கு கிழே நிறுத்தப்பட்டதுமாதிரி ஒரு பிரமாண்ட 'ஓ' சத்தமும், ஓர் ராட்சத அதிர்வும் பலமாகிக்கொண்டே போனது, பயமும் இவற்றின் இணையாக. லேசான வியர்வையினப்பறம் பதட்டம் குறைந்துவிட்டது. உடம்பின் geometric நடுவிலிருந்து உணர்ச்சி மறைய ஆரம்பித்து, தொடர்ந்து, அதன்பின் உடலின் எல்லைகளனைத்தும் மறைந்தபின் மறைதல் முற்றுபெற்றது. கொஞ்சநேரத்தில் நிசப்தம் நிலவி எல்லாம் நிதானமானது. நொடிகளையும் பல்கூறுகளாக பகுக்கப்பெற்று ஒவ்வொன்றிலும் நிலைத்து நின்ற அமைதி. கண்ணை முடி உயரமானவொன்றின் விளிம்பில் நிற்கையில் வெளியேபரவியிருந்த காற்றின் கனமேயிருந்தது உடலும், மனமும். இருந்தும் இல்லாதது போலவொரு உணர்தல்.

Hotel California-வின் வரிகள் முதல் முறையாய் புரிய ஆரம்பித்தது. Bob Marleyயின் இசை மேல் இனம் புரியாதவொரு ஈர்ப்பு. ஒத்ததிர்வில் புரிந்துகொள்ளக் கூடியதாய் இருந்திருக்கலாம் அவர்களும், அவர்களின் இசையும். அவர்களின் கிட்டார் நாணின் அதிர்வில் ஒரு கேள்விபிறந்து அதன் நீட்சியாய் இன்னோன்றேன்று பல கேள்விகள் மொய்த்துக் கொண்டேயிருந்தது. அத்தனை கேள்விகளும் ஒரே புள்ளியில் குவிந்து ஏதோ இருட்டை நோக்கி பயணித்துக்கொண்டிருப்பதாய் உணரும் நேரத்தில், ஏதோவொரு நரம்புகளில் உணர்கிறேன் எலும்பைத்தாண்டியுணர்த்தும் குளிரை. அத்தனை அமைதியாய் ஆம்ஸ்டெல் ஆற்றினுள்ளே மூழ்கிக்கொண்டேயிருக்கிறது தனிச்சையாய் என்னுடல். ஜன்ம ராசியை சனிப்பார்ப்பதால் தீர்காயுள் உறுதியென்று எப்பொழுதோ சொன்ன ஜோதிடனின் குரல் மட்டும் ஒருமையாய் கேட்டுக்...

பிரிவுப்பேச்சுகள்

2008-12-18T06:29:00.025+05:30

தனித்தனியே பொறுக்கியெடுத்து
சபித்தபடி

பிரிவை பேசும்போது

அடிவயிற்றைக் கீறிப்பிளந்ததாகவோ

உயிர்கிழிக்க தொடங்கியதாகவோ
இதயம் கழற்றியெறியப்பட்டதாகவோ
அல்லது
வேறதையும் உணர்த்திப் போனதாகவோ
தெரியவில்லை

வெளிறியிருக்கும்
அந்த நாட்களின்
பின் மதியப்பொழுதில்
நாட்குறிப்பின் முடிந்துபோன பக்கமொன்றினுள்
பதித்துவைக்கிறேன்
உமிழமுடிந்த அனைத்து உணர்ச்சிகளையும்
எழுதாத பேனாவில்
பின்னொரு நாளில் அழுவதற்காக.

மறுபடி, மறுபடி
அவளை பார்க்க நேரிடும்
சூழலின் அபத்தங்களை
குரூரமக்கிவிடுமோ
பிரிவுப்பேச்சுகள்
பிரியும்வரை?

உயிரோசையில் பிரசுரமான கவிதை

சிதறல்கள்

2008-12-09T20:12:00.004+05:30

ஒரு மழைநாளில்
என் தெருவாசியான அந்த நாய்
செம்மண் நிறத்தில் ரெண்டு,
கருப்புவெள்ளையாய் ஒன்று
பெயர்தெரியாத நிறத்தில் மூன்றென
ஆறு குட்டிகள் ஈன்றிருந்தது.

ஒருநாள் ஆபீஸிலிருந்து திரும்பும்போது,
கருப்புவெள்ளை குட்டி
எதனாலேயோ இறந்திருந்தது.
செய்தித்தாள்களின் விளையாட்டுச் செய்திபோல்
விரும்பாமலும் கண்ணில் பட்டுத்தொலைத்தது.

அதைப்பார்த்த அவள்
சிலநாள் பாசத்திற்கு
வீடுவந்ததும்
தேம்பி அழுதாள்.
மணி பார்த்தவுடன்
கண்துடைத்து
வெங்காயம் வாங்கிவரச்சொல்லிவிட்டு
சமைக்கச்சென்றுவிட்டாள்.

வெங்காயம் வாங்கித் திரும்புகையில்
எங்கேயோ போயிருந்த
இறந்துப்போனதின் அம்மா
வந்து
அதை முகர்ந்துவிட்டு
அதற்கான உணவை
சாப்பிடச்சென்றுவிட்டது.

வீடுவந்ததும்,
கத்தரிக்காய் வதக்கிக்கொண்டிருந்த
அவளின் சேலை வசீகரமாய்
விலகி இருந்தது.
வெங்காயம் கொடுத்துவிட்டு
காதோரமாய் முத்தமிட்டதும்
வெட்கப்பட்டாள்.

ஏதோ டிவியின்
வானிலயறிக்கையில்
நாளை மீண்டும் மழைவருமென்றது.

தன்வினை

2008-12-09T20:11:00.003+05:30

ப்ராஜெக்ட் முடிக்க
ஓவர் டைமில் வேலைசெய்து திரும்பும் அவள்
பேச்சுத்துணைக்கு போன் செய்திருந்தாள்.
வழிதோறும் நடந்தவைகளை
ஒலிபரப்பிக்கொண்டிருக்கையில்
எதிர்ப்பட்ட
நொண்டி பிச்சைக்காரன்,
பீடி பிடிக்கும் ஆட்டோக்காரன்,
மொபைலில் பேசிக்கொண்டிருக்கும்
மேல் பட்டன் போடாத எவனோஒருவனென
எவருமே
நல்லவராய் தெரியவில்லையெனக்கு
அவள் வீடு சேரும்வரை.

அன்றொருநாள்
இரவு பதினொரு மணிவாக்கில்
இளஆரஞ்சு நிற சுடிதாரணிந்து
மாநிறமாய்
நீள்வட்ட முகத்தில்
அழகிய உதட்டுடன்
எனைப்பார்த்ததும்
மிரண்டு வேகமாய் நகர்ந்த எவளயோ
எதேச்சையாய் நினைவுக்கு வந்தது.

சட்டென்று
இந்த இரு சம்பவத்துக்கும்
சம்பந்தமில்லையென்று சொல்லிக்கொண்டது
உள்ளிருந்து ஏதோ

உயிரோசையில் பிரசுரமான கவிதை

சுருக்கங்கள்

2008-12-09T20:08:00.000+05:30

நண்பர்களுடனான அன்றைய பயணத்தில்
திரும்பக் கூப்பிட
அவள் கொடுத்த மிஸ்டு காலின்பின்
சிக்னல் தீர்ந்த 500 மீட்டர் தூரத்தில்
வேகமாய் போக
பஸ் டிரைவரையும்
டென்ஷன் தெரியாமல்
ஜோக்கடிக்கும் நண்பனையும்
டவர் வைக்காத
செல்போன் காரர்களையும்
திட்டி தீர்த்து,
சிக்னல் கிடைத்தபின்
நான் தொடர்புகொண்ட வாடிக்கையாளர்
தொடர்பிலக்கிற்கு வெளியே இருப்பதாய்
சொல்லும் ரெக்கார்டடு மேசேஜிக்கப்பறம்
காலருகில் கூடை வைத்ததற்க்காய்
மோர்கார பாட்டியை திட்டியதும்
நடப்பதற்கு வழிவிட்டு ஓரமாய் வைத்ததாய்
மன்னிக்கும்படி அவள் சொல்ல,
நான் சாரி சொல்லிவிட்டு
ரெண்டு ரூபாய்க்கு மோர் வாங்கி குடித்தபின்தான்
தணிந்தது
என் கோபமும்
பாட்டியின் இறுக்கமும்.

தனிமை

2008-12-09T20:06:00.001+05:30

நீ தெரியாதபோது
தகித்து எரிந்த இரவுகளில்
உனை தெரியாத தனிமை
ஒரு எதிரியாய் கடந்துசென்றது

நீ இருந்தபோது
நீ இல்லாத நேரங்களில்
அதே அழுத்தத்தின்
வேறு பரிமாணத்தில்
ஒரு மேகமாய் மாறி விட்டிருந்தது

நீ அருகிலிருக்கும்போது
நானில்லா உன் புகைப்படங்களில்
எட்டிப்பார்த்துவிடுகிறது என் தனிமை
எதிர் வீட்டு நாய்க்குட்டியாய்

எதேதோ சொல்லி
உன் கண்ணீரில் நம் காதலை
கரைத்த அந்த இரவிலிருந்து
ஒரு நண்பனாய் அருகே படுத்துக்கிடந்தது

இப்படி
தனிமையோடு சேர்ந்திருந்ததில்
என்னுடன் பழகிவிட்டிருந்தது
இப்போதெல்லாம்
என்னை விட்டு எங்கும் பிரிந்துபோவதேயில்லை
பர்சில் யாருக்கும் தெரியாமல்
வைத்திருக்கும்
என் ராசியான கடவுள்போல.

மகான்களின் புகைப்படங்கள்

2008-12-09T20:04:00.000+05:30

‘சிறந்த மனிதர்கள்’ புத்தகம் படித்து
உணர்ச்சிப்பெருக்கில் வாங்கிய
புகைப்படத்தில்
என் சுவரில் உயிரோடிருந்த அந்த மகான்
சில மாதங்களுக்குள்
மரச்சட்டங்களுக்கான இடைவெளியில்
கொஞ்சம்கொஞ்சமாய் ஒழுகிவிட்டிருக்கிறார்.
இப்போதெல்லாம்,
அவர் அங்கிருப்பதாய் தெரிவதே இல்லை!

நேயர் விருப்பம்

2008-12-09T20:02:00.000+05:30

மதம், இனம், மொழி பார்த்து
நிச்சயித்து
அம்மி மிதித்து, அருந்ததியும் பார்த்து
முடிந்துவிட்ட நம் திருமணத்தின்
களவி மயக்கத்தை கடந்துவிட்ட பின்
அன்றோருநாளின் நம் உக்கிர சண்டையில்
தூங்காமல் விழித்திருந்த நடுஇரவில்
டிவியில் ஒளிபரப்பானது
கல்லூரியில் எனை யாசித்தவளுக்கு
பிடித்தபாடல்கள்…
நேயர்விருப்பமாய்!

And then...

2008-12-09T20:01:00.001+05:30

நம் ஒவ்வொரு சந்திப்பிலும்
காத்திருக்கும் நமக்கான காதல்.
என்றாவது காதல் பேசுவோமென்று பல நாள் ஏமாந்து,
சலித்து நாம் சந்திக்கையில்
தென்படுவதேயில்லை.
அன்று விளையாட்டாய் பயந்து
எனை இறுகப்பிடித்து
நெடுநேரம் கழித்து நீ உணர்ந்தபோது
சத்தம் போடாமல் அருகே அமர்ந்திருந்தது!
இயல்பான அதன் சிரிப்புடன்
கைகுலுக்கி கண்ணடித்துச்சென்றுவிட்டது.

நீ, நான் மற்றும் சிவப்பு ஆறு

2008-12-09T19:50:00.004+05:30

அழுதுகரைத்த உன் ஞாபகங்கங்களின்
ஒவ்வொரு துளியும் பெருகி
சகிக்காத ஒரு சிவப்பு ஆறாய்
என் எல்லா பாதைகளின் ஓரங்களிலும்
துரத்தி வந்தது

முதலில் மிரட்டியது
மிரண்டேன்
கட்டளையிட்டது
அடிபணிந்தேன்
பிறகு,
களிம்பு பூசிவிடும் நண்பனானேன்
கொஞ்சம் விழித்தேன்
அதன்பின்
கவனிப்பிற்காகவும் பிறகு அன்பிற்காகவும் கெஞ்சியது
உதசினப்படுத்தினேன்
அழுதது.
இப்போது,
சிறு பையன்கள் மூத்திரம் போகும் சாக்கடையானது.

உயிரோசையில் பிரசுரமான கவிதை.

ஆழமாய்ப் புதைத்தல்

2008-12-09T19:44:00.004+05:30

நிதானமாய் பலநாட்கள் யோசித்து
திடமான ஒருமுடிவென்று நினைத்துதான்
அன்றைய இரவில்
குளிரில் விரல்கள் எரிய
ஆழமாய் புதைத்தபின்
காலையில் முளைத்துநிற்கும்

உன்மீதான என் காதலை
நீரூற்றி வளர்க்காமல்
என்ன செய்ய?

திரும்பியிருக்கலாம்!

2008-12-09T19:28:00.001+05:30

தெரியாமல் என் தோள் பார்த்து தொட்டுவிட்டாய்
சிணுங்கிவிட்டு என் கவனிப்பை உறுதிபடுத்திக்கொண்டாய்
சட்டை பொத்தான் போட்டு என் மார் வருடிக்கொண்டாய்
நடக்கையில் கைகலுரசும்போதைய என் மௌனத்தை கவனித்துக்கொண்டு,
முத்தங்கள் முடித்தபின் உன் சிவந்த கண்ணில்
என் கண்களை மாறிமாறி பார்த்துக்கொண்டாய்
ஏககாலத்தில் இத்தனையும் தாண்டி நடந்துகொண்டிருக்கையில்
நொடிப்பொழுதில் விலகி
திரும்பிப்பார்க்காமல் போகிறாய்
திரும்பியிருக்கலாம்
திரும்ப விரும்பவில்லையோ என்னவோ.

வெட்கம்

2008-04-04T19:31:00.001+05:30

யாருமற்ற, உட்புறம் பூட்டிய வீட்டின்
கழிப்பறைக்கதவை தாளிடுவது போல்தான்
நம் தனிமையில் உன் வெட்கமும்.